सिंगापुर (हाम्रो खेलकुद) – नेपाली राष्ट्रिय क्रिकेट टोलीका कप्तान पारस खड्काले आफू कुवेतविरुद्ध खेल्न फिट भएको बताएका छन् । उनले चोटका कारण मलेसियाविरुद्ध बाहिर बसेर हेर्नुपर्दा निकै गाह्रो भएको बताएका छन् ।

कतारविरुद्ध मंगलबार भएको खेलमा चोट बोकेपछि पारसले बुधबार मलेसियाविरुद्धको खेल गुमाएका थिए । चोट बोकेपछि पूर्ण विश्राम लिएका पारस शुक्रबार प्रशिक्षणमा उपस्थित रहेका थिए । उनले केहीबेर ब्याटिङ पनि गरे । प्रशिक्षणपछि हाम्रोखेलकुदसँग बोल्दै उनले बाँकी दुई खेलमा आफ्नो तर्फबाट उत्कृष्ट क्रिकेट खेल्ने बताएका छन् । पारसले मैदानको अवस्था हेर्दा कुवेतसँगको खेल सहज नहुने बताए ।

‘पहिलो खेल हारेपछि तीनै खेल जित्नै पर्ने अवस्थामा बलियो कमब्याक गरेका छौं । हामी ग्लोबल छनोटमात्र नभएर विश्वकप खेल्ने लक्ष्य लिएर अगाडी बढेका छौं त्यसैले अझै उत्कृष्ट क्रिकेट खेल्नुपर्छ । पहिलो खेल जे भयो त्यसलाई बिर्सेर राम्रो गर्नुपर्छ । मैदानको अवस्था हेर्दा कुवेतसँगको खेल सहज हुने छैन’,पारसले भने । पारसले आफ्नो अवस्था राम्रो सुधार भएको हुँदा खेल्नेमा विश्वस्त रहेको बताए ।

‘हामी आफ्नो तर्फबाट उत्कृष्ट क्रिकेट खेल्नेछौं । बाँकी दुई खेलमा कसरी खेल्ने भन्नेमा आजको दुवै खेलको नतिजाले पनि थाहा हुन्छ,’ पारसले थपे, ‘ अन्य नतिजाले हामीलाई जित मात्र आवश्यक पर्ने हो या रनरेट पनि चाहिन्छ भन्ने प्रष्ट हुन्छ । मैदानको अवस्था हेर्दा पहिला ब्याटिङ गरे १७०–१८० रन बनाउनु पर्नेछ । यसले पनि जित सुरक्षित छ भन्न सकिन्न, राम्रो बलिङ र फिल्डिङ पनि चाहिन्छ । ‘

पारसले जुन टिमले दबाबमा राम्रो गर्न सक्छ त्यहि टिमलेनै राम्रो गर्ने बताए । मलेसियासँगको खेलमा आफु बाहिर बस्नुपर्दा सहज नभएको बताए । ‘ मैदानभित्र रहँदा खेलमा केहि हुँदा त्यसलाई परिवर्तन गर्न सकिन्छ । बाहिर बस्दा हेरेर बस्नुबाहेक केहि गर्न सकिन्न,’ पारसले थपे ।

‘हामीले उपलब्ध खेलाडीबाट उत्कृष्ट टोली लिएर खेलाउने हो । मलाई आशा छ ज्ञानेन्द्रले आफ्नो लयलाई निरन्तरता दिने छन् । जित्दा सबै राम्रो देखिन्छ तर हार्दा धेरै प्रश्न उठ्छन् । हामीले उत्कृष्ट प्रर्दशन गर्नेछौं,’ पारसले आज राम्रो गर्यो भन्दैमा भोली पनि राम्रो गर्छनै भन्नेपनि नहुने बताए ।

नेपाल पहिलो खेलमा कतारसँग ४ विकेटले स्तब्ध भएको थियो । दोस्रो खेलमा भने उत्कृष्ट पुनरागमन गर्दै मलेसियालाई ७ विकेटले पराजित गरेको थियो । शुक्रबारको पहिलो खेलमा कुवेतले कतारलाई १० रनरले पराजित गरेको छ । त्यस्तै जारी अर्को खेलमा सिंगापुरले मलेसियालाई हराए नेपालले बाँकी खेल जितेमा सहजै ग्लोबल छनोटमा पुग्ने छ । नेपालले शनिबार कुवेत र आईतबार सिंगापुरसँग खेल्ने छ ।

हेर्नुहोस् प्रशिक्षणको भिडियो :