सिंगापुर (हाम्रो खेलकुद) – आईसीसी टि-२० विश्वकप २०२० एसिया क्षेत्र छनोट खेलेर नेपाली टोली भोली बेलुका नेपाल फर्किने भएको छ ।

नेपाली टोलीका व्यवस्थापक रमण शिवाकोटीका अनुसार नेपाली टोली भोली राती १०:३० मा विमानस्थल आईपुग्ने छ । आईतबार अन्तिम खेलमा सिंगापुरसँग पराजित भएपछि नेपाल प्रतियोगिताको तेस्रो स्थानमा झरेको छ ।

अन्तिम खेलमा नेपाल र सिंगापुरबीच विजयी हुने टोली विश्वकपको ग्लोबल छनोटमा पुग्ने समीकरण रहेको थियो । अघोषित रुपमा फाइनलजस्तो बनेको यस खेलमा नेपाल ८२ रनले पराजित भएपछि नेपालको विश्वकप खेल्ने सपना समाप्त भएको हो ।

घरेलु टोली सिंगापुर ४ खेलमा ३ मा जित सहित शीर्ष स्थानमा रहेर च्याम्पियन बनेको हो । नेपालले पनि ४ खेलमा समान २ मा जित र हारका साथ समान ४ अंक जोडेपनि नेट रन रेटमा पछि पर्दै तेस्रो बन्न पुग्यो । कुवेत चौथो र मलेसिया पाँचौ स्थानमा रहे । नेपालले पहिलो खेल कतारसँग ४ विकेटले हारेको थियो । मलेसिया र कुवेतलाई ७ विकेटले पराजित गरेपनि अन्तिम खेलमा सिंगापुरसँग पराजित हुँदा नेपाल एसिया छनोटबाटै बाहिरिनु परेको हो ।

नेपाली टोलीमा लेग स्पिनर सन्दीप लामिछाने र अलराउन्डर सोमपाल कामी भने आउने छैनन् । यी दुवै आज राती सिंगापुरबाट ग्लोबल टी २० क्यानडाका लागि त्यसतर्फ लाग्ने छन् । सन्दीप टोरन्टो नेशनल र सोमपाल विनिपेग हक्सबाट खेल्ने छन् । सोमपाललाई विनिपेगले ड्राफ्टमा ३ हजार अमेरिकी डलर न्युनतम रकम अनुबन्ध गरेको थियो । सन्दीपलाई टोरोन्टो नेशनले ६० हजार अमेरिकी डलर खर्चेर अनुबन्ध गरेको थियो ।