काठमाडौं (हाम्रो खेलकुद) – दोस्रो सिजनको पोखरा प्रिमियर लिग (पीपीएल) फ्रेन्चाइज टोली विराटनगर टाइटन्सको कप्तानी सिनियर टोलीका ओपनर तथा विकेटकीपर प्रदीप ऐरीले गर्ने भएका छन् । गत वर्ष विराटनगरको कप्तान लेग स्पिनर सन्दीप लामिछानेले गरेका थिए ।

सन्दीपको कप्तानीमा विराटनगर ५ खेलमा ४ मा हार र १ मा जित सहित पुछारमा रहेर बाहिरिएको थियो । सन्दीपले बिग ब्यासको कारण पीपीएल नखेल्ने भएपछि विराटनगरले प्रदीपलाई कप्तानको जिम्मेवारी दिएको हो । अन्य पाँच टोलीले भने कप्तान परिवर्तन गरेका छैनन् ।

एक्सपर्ट धनगढीले सिनियर टोलीका उप कप्तान दिपेन्द्र सिंह ऐरी, काठमाडौं गोल्डेन वारियर्सले सिनियर टोलीका कप्तान ज्ञानेन्द्र मल्ल, चितवन राइनोजले पारस खड्का र बुटवल ब्लास्टर्सले तीब्र गतिका बलर सोमपाल कामीलाई यथावत दिएका छन् । त्यस्तै गत वर्षको विजेता पोखरा पल्टनले शरद भेषावकरलाई नै कप्तानमा निरन्तरता दिएको छ ।

गत वर्ष हुलास काठमाडौं रोयल्सको स्थानमा यस पटक काठमाडौं गोल्डेन वारियर्स आएको छ । पोखरा प्रिमियर लिग मंसिर २८ देखी पुष १२ सम्म पोखरा रंगशाला मैदानमा हुने छ । बिग ब्यास लिग डिसेम्बर १७ देखी ८ फ्रेबुअरी सम्म चल्ने छ । सन्दीप मेलबर्न स्टार्सबाट खेल्ने छन् ।