जित सुनसरी (हाम्रो खेलकुद) – अनुभवी ब्याट्सम्यान हसिम अन्सारीले अविजित उत्कृष्ट अर्ध शतकीय इनिङ खेलेपछि सुनसरीको इनरुवामा जारी मनमोहन मेमोरियल राष्ट्रिय एकदिवसिय क्रिकेट प्रतियोगिता अन्तर्गत समुह बी को दोस्रो खेलमा प्रदेश नम्बर २ ले कर्णाली प्रदेशलाई ८ विकेटले हराएको छ ।

१ सय ३० रनको विजयी लक्ष्य पछ्याएको प्रदेश २ ले २२.५ ओभरमा २ विकेट गुमाउँदै पुरा गर्यो । प्रदेश २ को जितमा हसिम अन्सारी ७३ बलमा ११ चौका र १ छक्का सहित ८० रनमा अविजित रहे । सुरज पटेल ५० बलमा १ चौका र १ छक्का सहित ३३ रनमा अविजित रहे ।

ओपनर हरि शंकर शाहलाई ५ र सुधिर चौधरीले २ रनमा गुमाएपनि तेस्रो विकेटका लागि हसिम र सुरजले १ सय १८ रनको शतकीय अविजित साझेदारी गर्दै सहज जित पक्का गरे । कर्णालीका कन्जु र दिनेश अधिकारीले १-१ विकेट लिए ।

इनरुवा क्रिकेट मैदानमा टस जितेर ब्याटिङ थालेको कर्णाली ३१।५ ओभरमा अल आउट हुँदै १ सय २९ रनमा समेटियो । कर्णालीका कप्तान तथा ओपनर रविन्द्र जंग शाहीले सर्वाधिक ४६ रनको योगदान दिए ।

कुमार थापाले २० औं ओभरको पाँचौ बलमा राहुल प्रताप सिंहबाट क्याच आउट गराउनु अघि रविन्द्रले ६८ बलमा ६ चौका र १ छक्का प्रहार गरे । पहिलो विकेटका लागि रविन्द्र र विकेटकिपर बिपिन रावलले ७.४ ओभरमा ४१ रनको साझेदारी गर्दै राम्रो सुरुवात दिलाएपनि मध्यक्रम र तल्लोक्रमका ब्याट्सम्यान चल्न सक्दा कर्णाली सस्तैमा समेटिएको हो ।

हरि शंकर शाहले बिपिनलाई सुधिर चौधरीबाट सिलिपमा क्याच आउट गराएपछि कर्णालीले निरन्तर विकेट गुमाएको थियो । बिपिनले २० बलमा २ चौका १० रन जोडे । ११ औं ओभरको दोस्रो बलमा महबुब आलमले विजय बिष्टलाई १ रनमा बोल्ड आउट गरे ।

तीब्र गतिका बलर महबुबले आफ्नो बलिङ शैलीलाई परिवर्तन गर्दै स्पिनमा बोल्ड आउट गरेका थिए । १२ औं ओभरको चौथो बलमा हरि शंकरले टेक सलामी मगरलाई सिलिपमा सुधिरबाटै ५ रनमा क्याच आउट भए । २२ औं ओभरको पहिलो बलमा प्रकाश जैशीलाई कुमार थापाले १५ रनमा रन आउट गराए । उनले २४ बलमा २ चौका प्रहार गरे ।

तीन रन लिनेक्रममा ललित प्याकुरेल ३ रनमा २५ औं ओभरको चौथो बलमा ३ रनमा आउट भए । आदिल अन्सारीले राजकुमार शाहलाई शून्य र दीनेश अधिकारीले ३ रनमा आउट गरे । तल्लोक्रममा दिवन पुनले ३३ बलमा २ चौका सहित २३ रनको योगदान दिए । महबुब आलमले ४.५ ओभरमा १ मेडन सहित ११ रन खर्चेर ३ विकेट लिए ।

हरि शंकर शाहले ८ ओभरमा २ मेडन सहित २० रन खर्चेर २ विकेट लिए । आदिल अन्सारीले ४ ओभरमा १० रन खर्चिदै २ विकेट लिए । कुमार थापाको नाममा १ विकेट प्रदेश २ ले समुह चरणको दोस्रो तथा अन्तिम खेलमा शुक्रबार नेपाल पुलिस क्लबसँग खेल्ने छ । जसको विजेता सेमिफाइनलमा पुग्ने छ । पहिलो खेलमा पुलिसले कर्णालीलाई २ सय ६७ रनले हराएको थियो । कर्णाली दुबै खेलमा पराजित हुँदै बाहिरियो ।