सुसनरी (हाम्रो खेलकुद) – सुनसरीको इनरुवामा जारी मनमोहन मेमोरियल राष्ट्रिय एक दिवसिय क्रिकेट प्रतियोगिता अन्तर्गत समुह ‘डी’ को अन्तिम खेलमा मलेसिया-११ ले गण्डकी प्रदेशलाई २ सय ९९ रनको लक्ष्य दिएको छ ।

इनरुवा क्रिकेट मैदानमा टस जितेर ब्याटिङ थालेको मलेसिया-११ ले निर्धारित ४७ ओभरमा ८ विकेट गुमाउँदै २ सय ९८ रन बनायो । मलेसिया-११ का ओपनर तथा विकेटकिपर ऐनुल हकिमले सर्वाधिक ८९ रनको योगदान दिए ।

३९ औं ओभरको तेस्रो बलमा स्पिनर बिपिन खत्रीले बोल्ड आउट गरेपछि हकिम शतकबाट चुकेका थिए । उनले १ सय ११ बलमा ११ चौका प्रहार गरे । पहिलो विकेटका लागि ऐनुल हकिम र भुषण सेभले ११.३ ओभरमा ७८ रनको साझेदारी गर्दै राम्रो सुरुवात दिलाए ।

बिपिन खत्रीले एलबी डब्लू आउट गर्नुअघि सेभले ३४ बलमा ८ चौका र १ छक्का सहित ५० रन जोडे । २८ औं ओभरको पहिलो बलमा मलेसियाका कप्तान अहमद फैजलाई गण्डकीका कप्तान गोविन्द प्रधानले ३१ रनमा कट एण्ड बोल्ड आउट गरे ।

अहमदले ५२ बलमा ३ चौका प्रहार गरे । चन्द्रकान्त पौडेलले सैद अजिजलाई ६ रनमा क्याच आउट गराए । ४४ औं ओभरको पहिलो बलमा चन्द्रकान्तले मोहम्मद आरिफलाई २० रनमा एलबी डब्लू आउट गरे ।

मलेसियाका युवा अलराउन्डर बिरनदीप सिंहले तल्लोक्रममा ५० रन जोड्दै बलियो योगफलमा पुर्याए । बिपिन खत्रीले ४५ औं ओभरको दोस्रो बलमा बोल्ड आउट गर्नुअघि बिरनदीप सिंहले ४५ बलमा ३ चौका र २ छक्का प्रहार गरे ।

मोहम्मद हफिज १५ र नार्जिल रहमानले १३ रनको योगदान दिए । गण्डकी प्रदेशका स्पिनर बिपिन खत्रीले १० ओभरमा ५१ रन खर्चेर ३ विकेट लिए । चन्द्रकान्त पौडेलले ७ ओभरमा ५६ रन खर्चेर २ विकेट लिए । गोविन्द्र प्रधानले १ विकेट लिए ।