एजेन्सी – नेपाली लेग स्पिनर सन्दीप लामिछाने अनुबन्धित रहेको मेलबर्न स्टार्स बिग ब्यास लिगको फाइनलमा सिड्नी सिक्सर्ससँग १९ रनले पराजित भएको छ ।

शनिवार फाइनलमा जितको लागि १ सय १७ रनको विजयी लक्ष्य पछ्याएको मेलबर्न स्टार्सले निर्धारित १२ ओभरमा ६ विकेट गुमाउँदै ९७ रन मात्र बनाउन सक्यो । वर्षाको कारण खेल ढिला सुरुहुदा १२ ओभरमा झारिएको थियो । उसका निक लर्किनले २६ बलमा २ चौका र २ छक्का सहित सर्वाधिक ३८ रनको योगदान दिए । ओपनर मार्कस स्टोइनिस १०, कप्तान ग्लेन म्याक्सवेल ५, बेन डंक ११ र नाथन कुल्टर नाइलले १९ रनको योगदान दिए । सिड्नीका नाथन लायनले र स्टेभ ओकिफले २-२ विकेट लिए ।

त्यसअघि टस हारेर ब्याटिङ थालेको सिड्नी सिक्सर्सले निर्धारित १२ ओभरमा ५ विकेट गुमाउँदै १ सय १६ रन बनाएको थियो । उसका ओपनर जोश फिलिपले २९ बलमा ४ चौका र ३ छक्का सहित ५२ रनमा अविजित रहे । त्यस्तै स्टिभ स्मिथले २१ र जोर्डन सिल्कले २७ रन जोडे ।

मेलबर्नका एडम जम्पा र ग्लेन म्याक्सवेलले २-२ विकेट लिए । मेलर्न स्टार्सका अलराउन्डर मार्कस स्टोइनिस प्रतियोगिताको सर्वोउत्कृष्ट खेलाडी घोषित भए । स्टोइनिसले १७ खेलमा १ शतक र ६ अर्ध शतक सहित कुल ७ सय ५ रन बनाउँदै सर्वाधिक रन बनाउने खेलाडीमा शीर्ष स्थानमा रहेका थिए ।