काठमाडौं (हाम्रो खेलकुद) – आईसीसी विश्वकप लिग २ त्रिकोणात्मक सिरिजमा नेपालले पहिलो जित हात पार्ने क्रममा तीन कीर्तिमान बनाएको छ । शनिबार नेपालले अमेरिकालाई ३५ रनले पराजित गर्दै घरेलु मैदानमा पहिलो ओडीआई जित हात पारेको हो ।

नेपालले प्रस्तुत गरेको १ सय ९१ रनको विजयी लक्ष्य पक्ष्याएको अमेरिका ४४.१ ओभरमा १ सय ५५ रनमा अल आउट हुन पुग्यो । टस हारेर ब्याटिङ थालेको नेपाल एक समय कमजोर अवस्थामा पुगेको थियो । एक समय ४९-५ को कमजोर अवस्थामा पुगेको नेपाललाई विकेटकिपर विनोद भण्डारी र कुशल मल्लले अर्धशतकीय इनिङ खेल्दै प्रतिस्पर्धात्मक योगफलमा पुर्याएका थिए । बलिङमा करणसँगै स्पिनरको उत्कृष्ट प्रर्दशनमा मध्यम लक्ष्यमा नेपाल’को जित पक्का बन्यो । अमेरिकाविरुद्ध विश्व कीर्तिमान सहित तीन कीर्तिमान बनेका छन् ।

३. एकै सिरिजमा सर्वाधिक विकेट

नेपालको जित पक्का गर्न तीब्र गतिका बलर करण केसीले ७.१ ओभरमा १ मेडन राख्दै १५ रन खर्चेर ४ विकेट लिदै म्यान ‘अफ द म्याच’ चुनिए । पहिलो खेलमा करणले ओमानविरुद्ध ९ ओभरमा ४७ रन खर्चेर ४ विकेट लिएका थिए । योसँगै दुई खेलमा करणले ८ विकेट लिएका छन् । नेपालबाट एकै ओडीआई सिरिजमा करण सर्वाधिक विकेट लिने खेलाडी बनेका छन् ।

करणले २ खेलमा १६.१ ओभरमा ६२ रन खर्चेर ८ विकेट आफ्नो नाममा लेखाएका छन् । यसअघि एकै सिरिजमा सर्वाधिक विकेट लिने कीर्तिमान सोमपाल कामीको नाममा थियो । सोमपालले गत वर्ष यूएईसँगको तीन ओडीआई सिरिजमा २१.३ ओभर बलिङ गर्दै ४ मेडन सहित १ सय १४ रन खर्चेर कुल ७ विकेट लिएका थिए ।

२. कुशल र विनोदको साझेदारी

एक समय ४९-५ को कमजोर अवस्थामा पुगेको नेपाललाई बलियो योगफल सम्म पुर्याउन छैटौं विकेटका लागि कुशल मल्ल र विनोद भण्डारीले ८४ रनको महत्वपूर्ण साझेदारी गरेका थिए । जुन नेपालले ओडीआईमा गरेको कुनै पनि विकेटका लागि उच्च साझेदारी हो । यस अघि नेपालको ओडीआईमा उच्च साझेदारी ८२ रन थियो । गत वर्ष यूएईसँगको दोस्रो ओडीआई खेलमा आरिफ शेख र रोहित कुमार पौडेलले छैटौं विकेटका लागि ८२ रनको साझेदारी गरेका थिए ।

१. कुशलको विश्व कीर्तिमान

डेब्यू खेलमै कुशलले ५१ बलमा ४ चौका र ३ छक्का सहित ५० रन जोडे । ब्यक्तिगत ३८ रनमा जीवनदान पाएका कुशलले ४९ बलमा अर्ध शतक पुरा गरेका थिए । उनको अर्ध शतकसँगै विश्व कीर्तिमान बन्यो । कुशल ओडीआईमा सर्वाधिक सानो उमेरमा अर्ध शतक पुरा गर्ने विश्वकै कान्छा खेलाडी बन्न पुगे । कुशल १५ वर्ष ३ सय ४० दिनका भएका छन् । कुशलले उक्त कीर्तिमान नेपालकै रोहित कुमार पौडेलको कीर्तिमान तोडेका हुन् ।

यसअघि उक्त कीर्तिमान रोहितले १६ वर्ष १ सय ४६ दिनको उमेरमा गत वर्ष यूएईसँगको दोस्रो वान डे खेलमा ५५ रन जोड्दै रचेका थिए । जसक्रममा रोहितले भारतीय पुर्व कप्तान सचिन तेन्दुलकर र पाकिस्तानका पुर्व कप्तान शाहिद अफ्रिदीको कीर्तिमान तोड्दै आफ्नो नाममा लेखाएका थिए । आज कुशलले रोहितकै स्थान लिएका थिए ।