काठमाडौं (हाम्रो खेलकुद) – युवा ब्याट्सम्यान कुशल मल्लले अमेरिकाविरुद्ध शनिबार भएको आईसीसी विश्वकप लिग २ अन्तर्गत खेलमा आफूले शतक बनाउन चाहेको बताएका छन् ।

कुशल अमेरिकाविरुद्ध ५१ बलमा ५० रन जोड्दै ओडीआईमा अर्धशतक बनाउने विश्वकै सर्वाधिक कान्छा खेलाडीको कीर्तिमान बनाउन सफल भए । उनले यसअघि नेपालकै युवा ब्याट्सम्यान रोहित कुमार पौडेलले राखेको कीर्तिमान तोडेका हुन् । कुशलले आफ्नो अर्धशतक पूरा गरेपनि कुनै पनि सेलेब्रेसन गरेनन् । कुशलले आफ्नो ५० रनबाट मात्रै खुसी नरहेको बताए ।

‘टोलीको लागि धेरै भन्दा धेरै रन बनाउनुपर्छ भन्ने मनमा थियो । टोलीको योगफल जम्मा १ सय ३० रन थियो । १४ ओभर बाँकी थियो । त्यसैले शतक बनाउने सोचिरहेको थिएँ’, कुशलले भने ।

उनले आफू आत्माविश्वासको साथ खेलेको र गलत बलको पर्खाइमा रहेको बताए । ‘आफ्नो लाइनमा आएको बल हानी रहे । नेपाली टोलीबाट ओडीआई खेल्ने सपना थियो । सपना पूरा हुँदा आत्माविश्वासी थिएँ,’ उनले थपे ।

खेलपछि बोल्दै कप्तान ज्ञानेन्द्र मल्ले पनि कुशलको प्रशंसा गरे । ‘जितमा खुसी छौं । विकेट हेर्दा केहि गाह्रो थियो । सहजै ब्याटमा आएको थिएन । कुशल र विनोदको साझेदारीले हामी खेलमा परिवर्तन गर्न सक्यौं,’ उनले भने, ‘हामीलाई थाहा थियो विकेट गाह्रो छ भन्ने । स्पिन अट्याक बलियो हुँदा जित्न सक्छौं भन्ने लागेको थियो ।’

चार विकेट लिदै म्यान अफ द म्याच चुनिएका करण केसीले आफु आत्माविश्वासी हुनुको साथै टीयूको विकेटको बारे राम्रोसँग थाहा पाएको फाइदा उठाएको बताए । उनले सोमपालको अनुपस्थितिमा केहि जिम्मेवारी बढेकाले पनि प्रदर्शन गर्न सफल हुँदा खुसी रहेको बताए ।