काठमाडौं (हाम्रो खेलकुद) – नेक्सस क्रिकेट एकेडेमीले हिमालय क्रिकेट लिग (एचसिएल) दुई दिवसीय क्रिकेट प्रतियोगिताको पहिलो दिन अग्रता बनाएको छ ।

बिहीबार वर्षाले खेल प्रभावित हुनुअघि नेक्ससले हिमालय क्रिकेट एकेडेमीविरुद्ध अग्रता लिन सफल भएको हो । दोस्रो इनिङ्समा नेक्ससले ५.३ ओभरमा विना विकेट २१ रन जोडेर खेलिरहँदा लाइट प्रोटेस्टका कारण खेल रोकिएको थियो । रित गौतम १३ तथा विपिन विक्रम शाही ८ रनमा क्रिजमा छन् ।

त्यसअघि मुलपानी क्रिकेट मैदानमा टस जितेर पहिले ब्याटिङ गरेको नेक्ससले ४४.४ ओभरमा सबै विकेट गुमाएर १ सय ३४ रनको सामान्य योगफल तयार पारेको थियो । नेक्ससका मध्यक्रमका आकाश चन्दले सर्वाधिक २१ रनको योगदान दिए । उनले २८ बलमा चार चौक प्रहार गरे । सनोज केसीले २० रन बनाए । ओपन विपिन विक्रम शाहीले १९ रन तथा प्रियान्सु श्रेष्ठले १५ रन जोडे । रित गौतम २ रनमा पेभिलियन फर्किए ।

बिशाल बिक्रम केसी १० रनमा तथा महेश राना १२ रनमा आउट भए । नरेश साउदले ५ रन तथा कृष कार्की २ रनमा आउट हुदा सक्रिय कार्की शुन्यमा आउट भए । समिर तिमल्सिनाले ९ रन जोडे ।

हिमालय क्रिकेट एकेडेमीका सन्दीप खड्काले १४.४ ओभर बलिङ गर्दै ३ मेडनसहित ४३ रन खर्चिएर ५ विकेट लिए । प्रकाश कार्कीले १५ ओभरमा ४ मेडनसहित ४० रन खर्चिएर ३ विकेट लिदा प्रतिश जिसीले १ विकेट आफ्नो नाममा लेखाए ।

हिमालय २८.३ ओभरमा १ सय १७ रनमा अलआउट हुन पुग्यो । खराव शुरुवात गरेको हिमालयका ६ ब्याट्सम्यानले रनको खाता खोल्न सकेन । ओपनर दीपक बोहोराले २५ रन जोडे । चार ब्याट्सम्यान खडक बोहोरा, विराट भण्डारी, गजेन्द्र बोहोरा र सुरज श्रेष्ठ शुन्यमा आउट हुदा हिमालय ६-४ को दयनीय अवस्थामा पुगेको थियो ।

त्यसपछि क्रिजमा आएका रजत तिमलसिनाले दीपक बोहोरासँग मिलेर पाँचौ विकेटको लागि ६९ रनको साझेदारी गर्दै इनिङ्स उकासेका थिए । ४० बल खेलेका रजतले ६ चौका र २ छक्काको सहयोगमा ४५ रन बनाए । त्यसपछि दीपक बोहोरा २५ रनमा आउट भए । लगत्तै दीपक बोहोरा ५ रनमा तथा प्रतिश जिसी शुन्यमा आउट भए । सन्दीप शाहीले २१ रनको योगदान दिए । प्रकाश कार्की शुन्यमा आउट अुदा सन्दीप खड्का १ रनमा आउट भए ।

नेक्ससका नरेन साउदले ११ ओभरमा ३ मेडनसहित ४७ रन खर्चंदै एक्लै ७ विकेट लिन सफल भए । कृष कार्कीले २ तथा आकाश चन्दले १ विकेट हात पारे ।