एजेन्सी – विश्वभर फैलिएको कोरोना भाइरस (कोभिड१९) को कारण नेपालले आईसीसी विश्वकप लिग-२ अन्तर्गत खेल्ने तेस्रो अवे सिरिज पनि स्थगित भएको छ ।

नेपालले आफ्नो तेस्रो अवे त्रिकोणात्मक सिरिज स्कटल्यान्डमा नामिबियासँग खेल्ने कार्यक्रम थियो । तर क्रिकेट स्कटल्यान्डले बिहीबार जुलाई ४ देखि ११ सम्म स्कटल्यान्ड, नेपाल र नामिबियाबीच हुने तय भएको त्रिकोणात्मक एक दिवसिय सिरिज सरेको जनाएको छ । यस अघिनै आईसीसीले जुन ३० भन्दा अगाडी हुने सम्पूर्ण प्रतियोगिता स्थगित गर्दा नेपालको तालिकामा रहेको दुई अवे सिरिज पनि सरेका थिए ।

यस अघि नेपालको अप्रिल २० देखि २७ सम्म नामिबियामा स्कटल्याडसँग खेल्ने सिरिज सरेको थियो । त्यस्तै नेपालले जुन ९ देखि १६ सम्म पपुवा न्यु गिनीमा संयुक्त अरब इमिरेट्स (यूएई) सहित हुने त्रिकोणात्मक सिरिज पनि सरेको थियो । अब यी खेलको अर्को मिति आईसीसीले पछि निर्धारण गर्नेछ ।

नेपालको अव आइसिसी विश्वकप लिग २ मा त्रिकोणात्मक सिरिज २०२१ मा खेल्ने छ । २०२१ को जनवरीमा ओमानमा नेपाल र अमेरिकाबीच त्रिकोणात्मक सिरिज हुने छ । २०२१ को फ्रबुअरीमा नेपालले घरेलु मैदानमा पपुवा न्यु गिनी र युएईसँग त्रिकोणात्मक सिरिज खेल्ने कार्यक्रम छ ।

नेपालले आइसिसी विश्वकप लिग २ मा माघमा ओमान र अमेरिकासँग पहिलो त्रिकोणात्मक एक दिवसिय सिरिज खेलेको थियो । उक्त सिरिजमा नेपाल ओमानसँगको दुबै खेलमा पराजित भएको थियो । अमेरिकालाई भने नेपालले दुबै खेलमा पराजित गरेको थियो ।