काठमाडौं (हाम्रो खेलकुद) – नेपाल एपिएफ क्लबले ललितपुर मेयर वुमन्स च्याम्पियनसिप–२०७७ टि२० क्रिकेट प्रतियोगिता सानदार विजयी सुरुवात गरेको छ । पहिलो खेलमा शनिवार एपिएफले प्रदेश–१ लाई ८ विकेटले पराजित गर्दै विजयी सुरुवात गरेको हो ।

जितको लागि १ सय ७ रनको विजयी लक्ष्य पछ्याएको एपिएफले १८ ओभरमा २ विकेट गुमाउँदै पूरा गर्यो । एपिएफकी कप्तान तथा ओपनर सीता रानामगर ५० बलमा ७ चौका सहित ५२ रनमा अविजित रहँदै कप्तानी इनिङ खेलिन् । सीताले १७ औं ओभरको पाँचौ बलमा स्पिनर संगिता राईलाई चौका प्रहार गर्दै ४९ बलमा अर्धशतक पूरा गरेकी थिइन् । ललितपुर च्याम्पियनसिपमा अर्धशतक पूरा गर्ने सीता पहिलो खेलाडी हुन् ।

ओपनर सीता र विकेटकिपर ज्योती पाण्डेले पहिलो विकेटका लागि १२.३ ओभरमा ७० रनको साझेदारी गर्दै सहज जिततर्फ अघि बढाएका थिए । ज्योती पाण्डे ४० बलमा ५ चौका सहित ३२ रनमा आउट भईन् । सरिता मगर ६ रनमा आउट हुँदा ईन्दु बर्मा ८ रनमा अविजित रहिन् ।
प्रदेश १ की संगिता राई र रुविना क्षेत्री बेलबासले १–१ विकेट लिए ।

त्यसअघि टियु क्रिकेट मैदानमा टस जितेर पहिला ब्याटिङ रोजेको प्रदेश-१ ले निर्धारित २० ओभरमा ४ विकेट गुमाउँदै १ सय ६ रन बनाएको थियो । प्रदेश-१ की कप्तान रुविना क्षेत्री बेलबासे ४८ बलमा ६ चौका सहित सर्वाधिक ४५ रनको योगदान दिईन् । युवा ब्याटर रोमा थापाले ४२ बलमा ५ चौका सहित ३३ रनमा क्याच आउट भईन् ।

तेस्रो विकेटका लागि रोमा र रुविनाले ६६ रनको महत्वपूर्ण साझेदारी गरेका थिए । पहिलो ओभरको तेस्रो बलमा मध्यगतिकी बलर रेखा रावलले ओपनर अप्सरी बेगमलाई शून्यमा बोल्ड आउट गरिन् । दोस्रो विकेटका लागि रुविनाले विकेटकिपर काजल श्रेष्ठसँग ६ ओभरमा २६ रनको साझेदारी गरेकी थिईन् ।

कप्तान सीता राना मगरले १७ औं ओभरको चौथो बलमा रुविना अघि बढेर ठूलो सट खेल्ने धुनमा बल मिस गर्न पुगेपछि विकेटकिपर ज्योती पाण्डेले स्टम्पिङ आउट गरेकी थिइन् ।

स्पिनर करुणा भण्डारीले ४ ओभरमा १५ रन खर्चेर १ विकेट लिइन् । रेखा रावल, बिनु बुढामगर र सीता रानामगरले १–१ विकेट लिइन् । एपिएफले कुल ८ बलरलाई बलिङ गराएको थियो । प्रदेश-१ ले आफ्नो दोस्रो सोमबार लुम्बिनी प्रदेशसँग खेल्ने छ । एपिएफले आइतबार सुदूरपश्चिमसँग खेल्ने छ ।