काठमाडौं (हाम्रो खेलकुद) – त्रिकोणात्मक टि२० आई सिरिज अन्तर्गत पहिलो खेलमा आज नेपाल र नेदरल्यान्ड्सबीच प्रतिस्पर्धा हुँदैछ । खेल नेपाली समय अनुसार दिउँसो १:१५ मा टियु क्रिकेट मैदानमा हुनेछ ।

दुवै टोली त्रिकोणात्मक सिरिजमा विजयी सुरुवात गर्न चाहन्छन् । नेपालको कप्तानी ज्ञानेन्द्र मल्ल र नेदरल्यान्ड्सको नेतृत्व पिटर सीलारले गर्ने छन् । नेपाल र नेदरल्यान्ड्सबीच अन्तिम पटक प्रतिस्पर्धा २०१९ अक्टोबर ७ मा भएको थियो । ओमानमा सम्पन्न पाँच टोली बीचको टि२० आई सिरिजमा यी दुई टोलीले खेलेका थिए ।

नेपाली टोलीमा अनुभवी ब्याट्सम्यान पारस खड्का छैनन् । कमजोर ब्याटिङ नेपालको प्रमुख समस्या हो । त्यसैेले नेपालको प्लेइङ-११ ब्याटिङ केन्द्रित हुने छ । नेपालको ब्याटिङमा भने गहिराई हुने देखिन्छ । टोली सन्तुलनलाई पनि त्यतिनै ध्यान दिने छ ।

आजको खेलमा दुई युवा खेलाडीको डेब्यू सम्भावना छ । स्पिनर साहब आलम र युवा ओपनर आसिफ शेखले डेब्यू गर्ने सम्भावना देखिन्छ । ओपनिङमा आशिफ शेख र कुशल मल्लले गर्न सक्छन् । कुशल मल्ल देब्रे हाते खेलाडी हुँदा टोलीको रणनीतिमा सहज हुन्छ । अर्कोतर्फ कुशल आक्रामक ब्याटिङका लागि परिचित छन् । गतवर्ष थाईल्यान्डमा भएको एसिसी इस्टर्न रिजनमा कुशल ओपनिङ गरेका थिए । आसिफले घरेलु क्रिकेटमा लगातार उच्च प्रदर्शन गर्दै आएका छन् । आसिफको भूमिका टोलीलाई राम्रो सुरुवातको साथ ठूलो योगफलमा पुर्याउने हुने छ । पहिलो खेलमा कुशल भुर्तेलको सम्भावना कम देखिन्छ ।

पारस खड्का टोलीमा नहुँदा ज्ञानेन्द्र मल्लले तेस्रो नम्बरमा ब्याटिङ गर्ने सम्भावना छ । चौथो नम्बरमा दीपेन्द्रसिंह ऐरीको सम्भावना देखिन्छ । दीपेन्द्रलाई मध्यक्रममा उच्च प्रदर्शन गर्नुपर्ने दबाब र आवश्यक दुबै छ । पाँचौ नम्बरमा विनोद भण्डारीको सम्भावना छ । विनोद उच्च लयमा छन् । मध्यक्रम दीपेन्द्र, विनोद र ज्ञानेन्द्रमा निर्भर रहने छ ।

विनोद पछिल्ला दुई घरेलु प्रतियोगितामा शतक प्रहार गरेका छन् । अर्कोतर्फ टियु मैदानको उनको लक्की मानिन्छ । नेपालले आरिफ शेख र सन्दीप जोरा मध्य एकलाई मौका दिने छ । आरिफले पछिल्लो समय मध्यक्रममा लगातार प्रदर्शन गर्दै आएका छन् । प्रधानमन्त्री कपमा एपिएफविरुद्ध घाइते हुन पुगेका थिए । टोलीमा पारस नहुँदा अनुभवी आरिफलाई पहिलो रोजाईमा उतार्न सक्छ । करण केसी र सोमपाल कामीले फिनिसरको भूमिका निर्वाह गर्ने छन् । यी दुबै खेलाडी आक्रामक ब्याटिङको लागि चिनिन्छन् ।

डेथ ओभर स्पेलिष्ट अभिनाश बोहराको स्थान पक्का पक्कि छ । तीन तीव्र गतिको बलरमा सोमपाल, करण र अभिनाश खेल्ने छ । करण र सोमपाललाई अलरान्डर मानिन्छ । नेपालले दुई स्पिनर मैदान उतार्ने छ । विश्व फ्रेन्चाइज लिगमा उच्च प्रदर्शन गर्दै आएका सन्दीप लामिछानेलाई सुशन भारी वा साहब आलमले साथ दिने छन् । सुशनले राष्ट्रिय टोलीमा डेब्यू गर्ने बलियो सम्भावना छ । घरेलु क्रिकेट र उमेर समूहमा लगातार उत्कृष्ट प्रदर्शन गर्दै आएका छन् ।

अर्कोतर्फ साहब तल्लोक्रममा ठूला सटको पनि क्षमता पनि राख्छन् । जसले साहबको सम्भावना बलियो छ । पार्टटाइम बलरमा दीपेन्द्र र कुशल मल्ल राम्रो स्पिन विकल्प हुने छन् । पछिल्लो समय घरेलु क्रिकेटमा दीपेन्द्र सफल पनि हुँदै आएका छन् ।

नेपालको सम्भावित प्लेइङ ११ : ज्ञानेन्द्र मल्ल (कप्तान), दीपेन्द्रसिंह ऐरी, विनोद भण्डारी, सोमपाल कामी, करण केसी, सन्दीप लामिछाने, अभिनाश बोहरा, आरिफ शेख, आसिफ शेख, कुशल मल्ल र साहब आलम ।