काठमाडौं (हाम्रो खेलकुद) – नेपालले त्रिकोणात्मक टि२० आई सिरिज अन्तर्गत पहिलो खेलमा नेदरल्यान्ड्सविरुद्ध राम्रो प्रदर्शन गरेको छ । टियु क्रिकेट मैदानमा टस हारेर पहिला ब्याटिङ थालेको नेदरल्यान्ड्सले १० ओभरमा २ विकेट गुमाउँदै ५० रन बनाएको छ ।

सुरुवाती तीन ओभरमै दुई विकेट गुमाएपछि दबाबमा परेको नेदरल्यान्ड्सले बाउन्ड्रीको लागि संघर्ष गरि रहेको छ । नेपाली बलरले लगातार राम्रो प्रदर्शन गरि रहेका छन् । नेदरल्यान्ड्सका ओपनर स्कर्ट एडवार्डस् १७ बलमा २ चौका सहित १७ रनमा अविजित छन् । बास डी लिडे ३० बलमा ३ चौका सहित २३ रनमा अविजित छन् ।

दोस्रो ओभरको अन्तिम बलमा ओपनर म्याक्स ओडोवडलाई स्पिनर सन्दीप लामिछानेले १० रनमा एलबिडब्लू आउट गर्दै पहिलो सफलता दिलाएका थिए । म्याक्सले ११ बलमा २ चौका प्रहार गरे । सोमपाल कामीले तेस्रो ओभरको चौथो बलमा बेन कुपरलाई शून्यमा एलबिडब्लू आउट गर्दै नेपाललाई उत्कृष्ट सुरुवात दिलाएका हुन् ।

१२–२ को कमजोर अवस्थामा रहेको नेदरल्यान्ड्सलाई तेस्रो विकेटका लागि लिडे र एडवार्डसले ३८ रनको साझेदारी गर्दै इनिङलाई अघि बढाएका छन् । नेपालका लागि पहिलो खेलमा डेब्यू गरेका साहब आलमले आफ्नो पहिलो ओभरमा १४ रन खर्चेका थिए । सातौं ओभरमा बलिङ गरेका साहबले २ चौका सहित उक्त रन खर्चेका थिए ।

सोमपाल कामीले ३ ओभरमा ९ रन खर्चेर १ विकेट लिएका छन् । करण केसीले २ ओभरमा २ रन मात्र दिएका छन् । साहब आलमले २ ओभरमा २३ रन खर्चेका छन् ।