काठमाडौं (हाम्रो खेलकुद) – डेब्यू खेल खेलेका स्पिनर साहब आलमले नेपालबाट त्रिकोणात्मक टि२० आई सिरिज अन्तर्गत पहिलो खेलमा नेदरल्यान्ड्सविरुद्ध पहिलो विकेट लिएका छन् । टियु क्रिकेट मैदानमा टस हारेर पहिला ब्याटिङ थालेको नेदरल्यान्ड्सले १४ ओभरमा ३ विकेट गुमाउँदै ७३ रन बनाएको छ ।

साहबले १४ औं ओभरको पाँचौं बलमा ओपनर स्कर्ट एडवार्डस्लाई ३० रनमा क्याच गराउँदै आफ्नो टि२० आई कअिरको पहिलो विकेट लिएका हुन् । लगातार दोस्रो शतक प्रहार गर्ने धुनमा स्कर्ट लङअनमा आरिफ शेखबाट क्याच आउट हुन पुगेका थिए । सुरुवाती तीन ओभरमै दुई विकेट गुमाएपछि दबाबमा परेको नेदरल्यान्ड्सले बाउन्ड्रीको लागि संघर्ष गरि रहेको छ । नेपाली बलरले लगातार राम्रो प्रदर्शन गरि रहेका छन् । नेदरल्यान्ड्सका बास डी लिडे २६ र पिटर सीलार क्रिजमा छन् ।

दोस्रो ओभरको अन्तिम बलमा ओपनर म्याक्स ओडोवडलाई स्पिनर सन्दीप लामिछानेले १० रनमा एलबिडब्लू आउट गर्दै पहिलो सफलता दिलाएका थिए । म्याक्सले ११ बलमा २ चौका प्रहार गरे । सोमपाल कामीले तेस्रो ओभरको चौथो बलमा बेन कुपरलाई शून्यमा एलबिडब्लू आउट गर्दै नेपाललाई उत्कृष्ट सुरुवात दिलाएका हुन् । १२–२ को कमजोर अवस्थामा रहेको नेदरल्यान्ड्सलाई तेस्रो विकेटका लागि लिडे र एडवार्डसले ६१ रनको साझेदारी गर्दै इनिङलाई अघि बढाएका थिए । जुन साझेदारी साहबले तोडेका हुन् ।

नेपालका लागि पहिलो खेलमा डेब्यू गरेका साहब आलमले आफ्नो पहिलो ओभरमा १४ रन खर्चेका थिए । सोमपाल कामीले ३ ओभरमा ९ रन खर्चेर १ विकेट लिएका छन् । करण केसीले ३ ओभरमा ५ रन खर्चेका छन् । साहब आलमले ३ ओभरमा ३१ रन खर्चेर १ विकेट लिएका छन् ।