काठमाडौं (हाम्रो खेलकुद) – नेपाली क्रिकेट टोलीका युवा ओपनर ओपनर कुशल भुर्तेलले त्रिकोणात्मक टि२० आई सिरिज अन्तर्गत पहिलो खेलमा नेदरल्यान्ड्सविरुद्ध आक्रामक कीर्तिमानी अर्धशतक प्रहार गरेका छन् ।

जितको लागि १ सय ३६ रनको मध्यम लक्ष्य पछ्याएको नेपालले सुरुवाती ८ ओभरमा कुनै विकेट नगुमाई ८२ रन बनाएको छ । कुशलले ३० बलमा अर्धशतक प्रहार गरे । नेपालबाट डेब्यू टि२० आईमा कम बलमा अर्धशतक पूरा गर्ने कुशल पहिलो खेलाडी बनेका छन् । कुशलले आठौं ओभरको अन्तिम बलमा एक रन बटुल्दै अर्धशतक पूरा गरेका हुन् ।

कुशल ३० बलमा ५ चौका र ४ छक्का सहित ५० रनमा खेलि रहेका छन् । आसिफ १९ बलमा १ चौका र २ छक्का सहित २४ रनमा खेलि रहेका छन् । यी दुबै खेलाडीले टि२० आई डेब्यू खेल खेलि रहेका छन् ।

पहिलो ओभरको तेस्रो बलमा खाता नखोल्दै क्याच आउट भएपनि नो बलको कारण जीवनदान पाएका कुशल भुर्तेलले त्यसपछि आक्रामक अर्धशतक प्रहार गरेका हुन् । नेपालबाट सन्दीप जोराले टि२० आईमा सन् २०१९ मा यूएईविरुद्ध डेब्यू गर्दै ४१ बलमा अर्धशतक पूरा गरेका थिए ।

त्यसअघि टियु क्रिकेट मैदानमा टस हारेर पहिला ब्याटिङ थालेको नेदरल्यान्ड्सले निर्धारित २० ओभरमा ४ विकेट गुमाउँदै १ सय ३५ रन बनायो । नेदरल्यान्ड्का मध्यक्रमका ब्याट्सम्यान बास डी लिडेले ४९ बलमा ३ चौका र २ छक्का सहित सर्वाधिक ४१ रनको योगदान दिए । तल्लोक्रममा एन्टोनियस स्टल ९ बलमा २ चौका र १ छक्का सहित २९ रनमा अविजित रहे । कप्तान पिटर सीलार १७ बलमा २ चौका र १ छक्का सहित २३ रनमा अविजित रहे । पाँचौं विकेटका लागि सिलार र स्टलले अन्तिम १८ बलमा ३४ रनको अविजित साझेदारी गर्दै टोलीलाई मध्यम योगफलमा पुर्याएका हुन् ।

दोस्रो ओभरको अन्तिम बलमा ओपनर म्याक्स ओडोवडलाई स्पिनर सन्दीप लामिछानेले १० रनमा एलबिडब्लू आउट गर्दै नेपाललाई पहिलो सफलता दिलाएका थिए । म्याक्सले ११ बलमा २ चौका प्रहार गरे । सोमपाल कामीले तेस्रो ओभरको चौथो बलमा बेन कुपरलाई शून्यमा एलबिडब्लू आउट गर्दै नेपाललाई उत्कृष्ट सुरुवात दिलाका थिए ।

एक समय १२–२ को कमजोर अवस्थामा पुगेको नेदरल्यान्ड्सलाई तेस्रो विकेटका लागि लिडे र एडवार्डसले ६१ रनको साझेदारी गर्दै इनिङलाई अघि बढाएका थिए । स्पिनर साहबले १४ औं ओभरको पाँचौं बलमा ओपनर स्कर्ट एडवार्डस्लाई ३० रनमा क्याच गराउँदै आफ्नो टि२० आई कअिरको पहिलो विकेट लिएका थिए । स्कर्टले ३२ बलमा २ चौका र १ छक्का प्रहार गरे । लगातार दोस्रो शतक प्रहार गर्ने धुनमा स्कर्ट लङअनमा आरिफ शेखबाट क्याच आउट हुन पुगेका थिए ।

तीव्र गतिका बलर सोमपाल कामीले ४ ओभरमा १३ रन खर्चेर १ विकेट लिए । लेग स्पिनर सन्दीप लामिछानेले ४ ओभरमा २२ रन खर्चेर २ विकेट लिए । करण केसीले ४ ओभरमा २२ रन खर्चे । सुरुवाती ३ ओभरमा ५ रन मात्र खर्चेका करणले अन्तिम ओभरमा १७ रन खर्चेका थिए । साहब आलमले ४ ओभरमा ४५ रन खर्चेर १ विकेट लिए । अभिनाश बोहराले ४ ओभरमा २५ रन खर्चे ।