एजेन्सी – जिम्बावेले दोस्रो टि२० आई खेलमा पाकिस्तानलाई १९ रनले पराजित गर्दै तीन टि२० आई सिरिजमा १-१ को बराबरी गरेको छ । शुक्रबार साँझ सम्पन्न खेलमा जितको लागि १ सय १९ रनको सामान्य लक्ष्य पछ्याएको पाकिस्तान १९.५ ओभरमा ९९ रनमा अल आउट हुन पुग्यो ।

पाकिस्तानका कप्तान बाबर आजमले ४५ बलमा ५ चौका सहित सर्वाधिक ४१ रनको योगदान दिए । ओपनर मोहम्मद रिजवान १३ र डनिस अजिजले २२ रन बनाउन बाहेक अन्य कुनैपनि ब्याट्सम्यानले दोहोरो अंकमा रन बनाउन सकेनन् । एक समय १५.४ ओभरमा ७८-३ को अवस्थामा रहेको पाकिस्तान कप्तान बाबर आजम क्याच आउट भएसँगै लगातार विकेट गुमाउँदा पराजित हुन पुगेको हो ।
जिम्बावेका ल्यूक जोंगवेले ३.५ ओभरमा १८ रन खर्चेर ४ विकेट लिए । रयान बुर्लले २ विकेट लिए ।

त्यसअघि घरेलु टोली जिम्बावेले हरारेमा टस हारेर पहिला ब्याटिङ गर्दै निर्धारित २० ओभरमा ९ विकेटको क्षतिमा १ सय १८ रन बनाएको थियो । जिम्बावेका ओपनर कमुनुखमुवेले ४० बलमा ४ चौका सहित सर्वाधिक ३४ रनको योगदान दिए । वेस्ले मधेभरेले १६, रेगिस चकब्वाले १८, तडिवनाशे मरुमनि र तरिसै मुसकान्डा १३–१३ रन बनाए । पाकिस्तानका मोहम्मद हसनैन र डनिस अजिजले २–२ विकेट लिए ।

पहिलो खेलमा पाकिस्तान ११ रनले विजयी भएको थियो । तेस्रो खेल आइतबार हुने छ ।