एजेन्सी – इन्डियन प्रिमियर लिग (आइपिएल) २०२१ को २५ औं खेलमा कोलकाता नाइट राइडर्सले दिल्ली क्यापिटल्सलाई १ सय ५५ रनको मध्यम लक्ष्य दिएको छ ।

नरेन्द्र मोदी स्टेडियम अहमदाबादमा टस हारेर पहिला ब्याटिङ थालेको कोलकाताले निर्धारित २० ओभरमा ६ विकेट गुमाउँदै १ सय ५४ रन बनायो । कोलकाता आन्द्रे रसेल २७ बलमा २ चौका र ४ छक्का सहित ४५ रनमा अविजित रहे । युवा ओपनर सुभमन गिलले ३८ बलमा ३ चौका र १ छक्का सहित ४३ रनको योगदान दिए । प्याट कमिन्स ११ रनमा अविजित रहे ।

स्पिनर अक्षर पटेलले चौथो ओभरको चौथो बलमा ओपनर नितिश रानालाई विकेटकिपर ऋषभ पन्तबाट १५ रनमा स्टम्पिङ आउट गर्दै पहिलो सफलता दिलाएका थिए । दोस्रो विकेटका लागि राहुल त्रिपाठी र सुभमन गिलले ३५ बलमा ४४ रनको साझेदारी गरेका थिए । दशौं ओभरको तेस्रो बलमा मार्कस स्टोइनिसले राहुल त्रिपाठीलाई १९ रनमा ललित यादवबाट क्याच गराउँदै साझेदारी तोडे ।

लगत्तै ११ औं ओभरको दोस्रो बलमा ललितले कप्तान ओईन मोर्गनलाई शून्यमा स्टिभ स्मिथबाट क्याच आउट गराए । दुई बलपछि सुनिल नारायण शून्यमा बोल्ड आउट हुँदा कोलकाता ७५–४ को कमजोर अवस्थामा पुगेको थियो । १३ औं ओभरको अन्तिम बलमा आवेश खानले सुभमन गिललाई स्मिथबाट क्याच गराए । दिनेश कार्तिकलाई अक्षर पटेलले १४ रनमा एबिडब्लू आउट गरे ।

दिल्लीका ललित यादवले ३ ओभरमा १३ रन खर्चेर २ विकेट लिए । अक्षर पटेलले ४ ओभरमा ३२ रन खर्चेर २ विकेट लिए । आवेश खान र मार्कस स्टोइनिसको नाममा १–१ विकेट रह्यो ।