एजेन्सी – दिल्ली क्यापिटल्सका ओपनर ब्याट्सम्यान पृथ्वी शाले कोलकाता नाइट राइडर्सविरुद्ध इन्डियन प्रिमियर लिग (आइपिएल) २०२१ मा एकै ओभरमा लगातार ६ चौका प्रहार गरेका छन् ।

जितको लागि १ सय ५५ रनको विजयी लक्ष्य पछ्याएको दिल्लीलाई ओपनर पृथ्वी शाले पहिलो ओभरमै लगातार ६ चौका प्रहार गरेका हुन् । पहिलो बल शिवम माभीले वाइड फालेका थिए । त्यसपछि भने शाले लगातार ६ चौका प्रहार गरे । समग्रमा शाहले पहिलो ओभरमै २५ रन बटुलेका थिए । आइपिएल इतिहासमा शा एकै ओभरमा ६ चौका प्रहार गर्ने दोस्रो खेलमा हुन् । शा अघि सन् २०१२ मा अजिक्या रहानेले राजस्थान रोयल्सबाट रोयल च्यालेन्जर्स बेंगलोरका श्रीनाथ अव्रिन्दलाईलाई एकै ओभरमा ६ चौका प्रहार गरेका थिए ।

त्यसअघि नरेन्द्र मोदी स्टेडियम अहमदाबादमा टस हारेर पहिला ब्याटिङ थालेको कोलकाताले निर्धारित २० ओभरमा ६ विकेट गुमाउँदै १ सय ५४ रन बनाएको थियो । कोलकाता आन्द्रे रसेल २७ बलमा २ चौका र ४ छक्का सहित ४५ रनमा अविजित रहे । युवा ओपनर सुभमन गिलले ३८ बलमा ३ चौका र १ छक्का सहित ४३ रनको योगदान दिए । प्याट कमिन्स ११ रनमा अविजित रहे ।

स्पिनर अक्षर पटेलले चौथो ओभरको चौथो बलमा ओपनर नितिश रानालाई विकेटकिपर ऋषभ पन्तबाट १५ रनमा स्टम्पिङ आउट गर्दै पहिलो सफलता दिलाएका थिए । दोस्रो विकेटका लागि राहुल त्रिपाठी र सुभमन गिलले ३५ बलमा ४४ रनको साझेदारी गरेका थिए । दशौं ओभरको तेस्रो बलमा मार्कस स्टोइनिसले राहुल त्रिपाठीलाई १९ रनमा ललित यादवबाट क्याच गराउँदै साझेदारी तोडे ।

लगत्तै ११ औं ओभरको दोस्रो बलमा ललितले कप्तान ओईन मोर्गनलाई शून्यमा स्टिभ स्मिथबाट क्याच आउट गराए । दुई बलपछि सुनिल नारायण शून्यमा बोल्ड आउट हुँदा कोलकाता ७५–४ को कमजोर अवस्थामा पुगेको थियो । १३ औं ओभरको अन्तिम बलमा आवेश खानले सुभमन गिललाई स्मिथबाट क्याच गराए । दिनेश कार्तिकलाई अक्षर पटेलले १४ रनमा एबिडब्लू आउट गरे ।

दिल्लीका ललित यादवले ३ ओभरमा १३ रन खर्चेर २ विकेट लिए । अक्षर पटेलले ४ ओभरमा ३२ रन खर्चेर २ विकेट लिए । आवेश खान र मार्कस स्टोइनिसको नाममा १–१ विकेट रह्यो ।