काठमाडौं (हाम्रो खेलकुद) – नेपालमा देखिएको दोस्रो चरणको कोरोना महामारीसँगै राष्ट्रिय तथा उमेर समूहले खेल्ने सम्पूर्ण राष्ट्रिय तथा अन्तर्राष्ट्रिय प्रतियोगिता अनिश्चित समयको लागि स्थगित भएको छ ।

नेपाल क्रिकेट संघ (क्यान) ले कोरोना माहामारीको कारण एक प्रेस विज्ञप्ति जारी गर्दै प्रस्तावित राष्ट्रिय प्रतियोगिता, जिल्ला तथा प्रदेश छनोट तथा द्धिपक्ष्य तथा त्रिकोणात्मक अन्तर्राष्ट्रिय सिरिज स्थगित भएको जनाएको छ । सम्पूर्ण जिल्ला तथा प्रदेशसंघलाई खेलका सम्पूर्ण गतिविधि अर्को सूचना जारी नगर्न सम्म स्थगित गर्न प्रेस विज्ञप्ति मार्फत जानकारी गराएको छ । क्यानको कार्यतालिका अनुसार नेपालले आगमी मे मा नामिबियासँग एकदिवसिय सिरिज खेल्ने तयारी थियो ।

जेठमा यू१९ राष्ट्रिय प्रतियोगिता आयोजना गर्न जिल्ला र प्रदेश छनोट गर्ने तयारी गरेको थियो । कोरोना महामारीलाई देखाउँदै क्यानले भारतको उत्तराखण्ड टोलीसँग महिला राष्ट्रिय टोलीले खेल्ने भनिएको एकदिवसिय तथा टि२० सिरिज स्थगित गरि सकेको थियो । नेपालले यसै साता टियु क्रिकेट मैदानमा मलेसिया र नेदरल्यान्ड्ससँगको त्रिकोणात्मक टि२० सिरिज ब्याटिङमा उत्कृष्ट प्रदर्शनका साथ उपाधि जितेको थियो । नेपालले फाइनलमा नेदरल्यान्ड्सलाई १ सय ४२ रनको फराकिलो अन्तरले हराउँदै उपाधि जितेको थियो ।