काठमाडौं (हाम्रो खेलकुद) – धुर्मुस सुन्तली फाउन्डेसनको पहलमा चितवन भरतपुरको शान्तिपुरमा निर्माण भइरहेको गौतम बुद्ध अन्तर्राष्ट्रिय क्रिकेट रंगशालाको निर्माण कार्य कोरोना महामारीको दोस्रो चरणमा पनि जारी रहने भएको छ ।

नेपाल र भारत सहित विश्वका विभिन्न देशमा दोस्रो चरणको कोरोना तीव्र रुपमा फैलिएको छ । नेपालका विभिन्न जिल्लाहरुमा लकडाउन भई सकेको छ रंगशाला निर्माण कार्य नरोकिने फाउण्डेसनका अध्यक्ष सिताराम कट्टेल (धुर्मुस) ले हाम्रो खेलकुदलाई जानकारी दिए । ‘रंगशाला निर्माण कार्य बन्द हुँदैन । अहिले पनि जारी छ । ठूलो समूहमा काम गर्न अवस्था भने रहँदैन। कोरोना भन्दा पनि ठूलो समूहमा काम गर्न आर्थिक कारणले गर्दा सम्भव छैन । भित्र ग्राउन्डको काम हुन्छ’, उनले भने ।

धुर्मुसले तीन हजार दर्शकले हेर्न मिल्ने प्याराफिट सम्पन्न भएको जानकारी दिएका छन् । ‘धुर्मुसले भने ,’त्यसको फिनिसिङ पलास्टरको काम छ । ग्राउन्डको काम अन्तिम चरणमा पुगेको छ । त्यसको लेभल समाउने काम भई रहेको छ । समाउने काम सकिएपछि दुबो लगाउने छौं । यो अवधिमा मैदान निर्माण गर्नी भन्नी छ । कोरोना त छदै छ त्यसमा अवको समयमा पानी हुँदा थप चुनौती बनेको छ ।’

जनशक्ति कति प्रयोग हुने भन्न नसक्ने धुर्मुस बताउँछन् । ‘यतिनै जनशक्ति भन्ने हुँदैन । जतिपनि लाग्न सक्छ । निर्माणको काममा थाहा छ । दुबो रोप्ने खन्नेमा हुँदैन । अहिले रंगशालामा ९० जना जति छन् । यो अवधीमा भिआइपी टावरको वान र टुको जग मात्र खनेका थियौं । भिआईपी टावर वानकोे यो अवधीमा काम हुन्छ । आर्थिक कुरा मात्र हुने हो भने कुनै पनि समय कुनै पनि काम रोकिदैन’, उनले भने, ‘कोरोनाले पनि काम रोकिदैन । किनभने कोरोनाको उच्च समयमा पनि काम गरेर यहाँ सम्म आई सकेका छौं । कोरोना कठिन समयमा पनि दुई तीन सय त्यहिँ भित्र काम गरेको हो । आर्थिक स्रोत व्यवस्थापन हुने हो भने कुनैपनि समय कुनै पल रंगशाला निर्माण रोकिदैन ।’

गत फागुनमा फाउण्डेसनले रंगशाला आम्दानी र खर्च सार्वजनिक गरेका थियो । फागुन सम्म रंगशाला निर्माणमा ४३ करोड ४८ लाख खर्च हुँदा ३२ करोड ३० लाख २४ हजार संकलन भएको थियो। रंगशाला निर्माणको लागि कुल लगात ३ अर्व ५५ करोड अनुमान गरिएको छ ।