एजेन्सी – इन्डियन प्रिमियर लिग (आइपिएल) २०२१ मा आज सर्वाधिक दुई सफल टोली मुम्बई इन्डियन्स र चेन्नई सुपर किंग्सबीच प्रतिस्पर्धा हुँदैछ । खेल नेपाली समय अनुसार बेलुका ७:४५ मा दिल्लीमा सुरु हुनेछ ।

महेन्द्रसिंह धोनीको कप्तानीमा रहेको चेन्नई मुम्बईलाई हराउँदै १२ अंकका साथ शीर्षस्थानमा कायमै रहन चाहन्छ । रोहित शर्माको कप्तानीमा रहेको मुम्बई इन्डियन्स चेन्नईलाई हराउँदै चौथो जितका साथ ८ अंक जोड्ने सोचमा छ । आइपिएलका यी दुई सर्वाधिक सफल टिम र कप्तानबीचको प्रतिस्पर्धा रोचक र कडा हुने अनुमान गरिएको छ । चेन्नई र मुम्बईको खेललाई ‘आइपिएल क्लासिको’ पनि भनिन्छ ।

मुम्बईले पछिल्लो खेलमा राजस्थान रोयल्सलाई ७ विकेटले पराजित गरेको थियो । ओपनर क्विन्टन डी ककले ५० बलमा ७० रनको इनिङ खेलेका थिए । सुरुवाती समय संघर्ष गरेका डी ककको लय फर्कनु मुम्बईको लागि सकरात्मक कुरा हो । रोहित शर्मा र सूर्यकुमार यादवलाई शीर्षक्रममा राम्रो प्रदर्शन गर्न आवश्यक देखिन्छ ।

क्रुनाल पाण्ड्याले चौथो नम्बरमा ब्याटिङ गर्दै राजस्थान विरुद्ध ३९ रनको इनिङ खेलेका थिए । हार्दिक पाण्ड्या र काइरन पोलार्डबाट मुम्बई उत्कृष्ट अन्त्य चाहन्छ । यस सिजनमा जस्प्रित बुमराह र ट्रेन्ट बोल्टको जोडीले अपेक्षा अनुसार प्रदर्शन गर्न सकेका छैनन् । यी दुई खेलाडीबाट चेन्नईविरुद्ध मुम्बई उत्कृष्ट प्रदर्शन चाहन्छ । स्पिनर राहुल चाहरको उच्च प्रदर्शन गर्दै आएका छन् । मुम्बईले आज टोलीमा परिवर्तन गर्ने सम्भावना कम देखिन्छ ।

चेन्नई पहिलो खेलमा दिल्लीसँग पराजित भएपनि त्यसपछि लगातार पाँच खेलमा जितका साथ १० अंक जोड्दै शीर्षस्थानमा छ । चेन्नईले ब्याटिङ र बलिङ दुबैमा उच्च प्रदर्शन गर्दै आएको छ । ओपनर फाफ डु प्लेसिस, रविन्द्र जडेजा र तीव्र गतिका बलर दीपक चाहर उत्कृष्ट लयमा छन् ।
ओपनर फाफ डु प्लेसिसले पछिल्ला तीन खेलमा रोयल च्यालेन्जर्स बेंगलोर, कोलकाता नाइट राइडर्स र सनराइजर्स हैदराबादविरुद्ध लगातार अर्धशतक प्रहार गरेका थिए । चेन्नई फाफ डु प्लेसिसबाट त्यस्तै उत्कृष्ट प्रदर्शन चाहन्छ । उनको लय रोक्न मुम्बईका बलरलाई कठिन पर्न सक्छ ।

भारतीय क्रिकेटका भविष्य मानिएका अर्का युवा ओपनर ऋतुराज गायकवाडले पनि राम्रो प्रदर्शन गर्दै आएका छन् । पछिल्लो खेलमा चेन्नईले हैदराबादलाई ७ विकेटले हराउन ऋतुराजले ७५ रनको उत्कृष्ट इनिङ खेल्दै प्लेयर अफ द म्याच चुनिएका थिए । पहिलो विकेटका लागि फाफ र ऋतुराजले १ सय २९ रनको उत्कृष्ट साझेदारी गरेका थिए । यी दुई खेलाडी मुम्बईविरुद्ध पनि म्याच विनर सावित हुन सक्छन् ।

सुरेश रैना, आम्बाती रायुडू, मोईन अली, रविन्द्र जडेजा र महेन्द्र सिंह धोनी टोलीमा हुँदा चेन्नईको ब्याटिङ बलियो छ । जडेजाले बेंगलोरविरुद्ध एकै ओभरमा ३७ रन प्रहार गर्नेक्रममा ६२ रन बनाउनुको साथै ३ विकेट लिदै सहज जित दिलाएका थिए । तल्लोक्रममा साम करन र ड्वेन ब्राभो जस्ता विश्वस्तरिय अलराउन्डर हुँदा चेन्नईको ब्याटिङमा गहिराई छ ।

करनले लगातार ब्याटिङ र बलिङ दुबैमा उत्कृष्ट प्रदर्शन गर्दै आएका छन् । तीव्र गतिका बलर दीपक चाहरले पावरप्लेमा उत्कृष्ट प्रदर्शन गर्दै आएका छन् । दीपकलाई साम करन, शार्दूल ठाकुर र लुन्गी एनगिडीले तीव्र गतिको बलिङ युनिटमा साथ दिने छन् । स्पिनरमा जडेजा र मोईन अली जस्ता अनुभवी खेलाडी छन् ।

सर्वाधिक सफल कप्तान र टिम

आइपिएल इतिहासमा चेन्नई र मुम्बई सर्वाधिक सफल टिम हुन् । १३ संस्करण सकिँदा यी दुई टोलीले ८ उपाधि जितेका छन् । मुम्बईले ५ र चेन्नईले ३ उपाधि जितेका छन् । मुम्बईले ६ र चेन्नईले ८ पटक आइपिएलको फाइनल खेलेको छ । चेन्नई गत वर्ष बाहेक अन्य सबै संस्करणमा प्लेअफमा पुग्ने एक्लो टोली ।

चेन्नईलाई धोनी र मुम्बईलाई रोहितले सवै उपाधि जिताएका हुन् । धोनीले १ सय ९४ खेलमा कप्तानी गर्दा १ सय १५ खेलमा जित र ७८ खेलमा हार बेहोरेका छन् । रोहितले १ सय २२ खेलमा कप्तानी गर्दा ७१ मा जित र ४७ मा हार बेहोरेका छन् । दुबै कप्तान शालिन, शान्त र खेलाडीलाई स्वतन्त्र छोड्नुको साथै विश्वास बढी गर्ने गर्दछन् ।

हेड टु हेड :

मुम्बई र चेन्नईबीच हालसम्म ३० खेल भएको छन् । मुम्बई १८ खेलमा विजयी हुँदा १२ खेलमा पराजित भएको छ । गतवर्ष पहिलो खेलमा मुम्बई ५ विकेटले पराजित हुँदा दोस्रो खेलमा १० विकेटले विजयी भएको थियो । २०१९ मा चेन्नईलाई एक रनले हराउँदै मुम्बईले उपाधि जितेको थियो । त्यस सिजनका चारै खेलमा मुम्बईले जितेको थियो ।

मुम्बईले जितेका पाँच मध्य तीन उपाधि फाइनलमा चेन्नईलाई हराउँदै छ । २०१८ यता यी दुई टोलीबीच ८ खेल हुँदा मुम्बई ६ खेलमा विजयी भएको छ ।

अंक तालिका

चेन्नई सुपर किंग्स ६ खेलमा ५ जित र १ मा हार सहित १० अंक सहित शीर्षस्थानमा छ । दिल्ली क्यापिटल्स ७ खेलमा ५ मा जित र २ मा हार सहित १० अंकका साथ दोस्रो स्थानमा छ । रोयल च्यालेन्जर्स बेंगलोर ७ खेलमा ५ मा जित र २ मा हार सहित १० अंक भएपनि नेट रनरेटको आधारमा तेस्रो स्थानमा छ । मुम्बई इन्डियन्स ६ खेलमा ३ मा हार र ३ मा जित सहित ६ अंक बटुल्दै चौथो स्थानमा छ ।

पन्जाब ७ खेलमा ४ मा हार र ३ मा जित सहित ६ अंक जोड्दै पाँचौं स्थानमा छ । कोलकाता ७ खेलमा ५ मा हार र २ जित सहित ४ अंकका साथ छैटौं स्थानमा छ । राजस्थान रोयल्स ६ खेलमा ४ मा हार र २ मा जित सहित ४ अंकका साथ सातौं स्थानमा छ । सनराइजर्स हैदराबाद ६ खेलमा ५ मा हार र १ मा जित सहित २ अंक जोड्दै पुछारमा छ ।