एजेन्सी – तीव्र गतिका बलर हसन अलीको उत्कृष्ट बलिङ र मध्यक्रमका ब्याट्सम्यान फवाद आलमको सानदार शतकमा जिम्बावेसँगको पहिलो टेष्ट खेलमा पाकिस्तान १ सय १६ रनको फराकिलो इनिङ अन्तरले विजयी भएको छ ।

पहिलो इनिङमा २ सय ५० रनले पछि परेको जिम्बावे दोस्रो इनिङमा ४६.२ ओभरमा १ सय ३४ रनमा अल आउट भएपछि पाकिस्तान फराकिलो इनिङ अन्तरले विजयी भएको हो । जिम्बावेका तरिसै मुसकान्डा सर्वाधिक ४३ रनको योगदान दिए ।

ओपनर केभिन कसुजा २८, ब्रेन्डन टेलर २९ र रेजिस चकभा १४ रन बनाउन बाहेक अन्यले दोहोरो अंकमा रन बनाउन सकेनन् । पाकिस्तानका तीव्र गतिका बलर हसन अलीले १२.२ ओभरमा २ मेडन सहित ३६ रन खर्चेर ५ विकेट लिए । नौमान अलीले २ र फहिम अशराफले १ विकेट लिए ।

पाकिस्तानले पहिलो इनिङमा १ सय ३३ ओभरमा ४ सय २६ रनमा अल आउट भएको थियो । पाकिस्तान फवाद आलमले २ सय ४ बलमा २० चौका सहित १ सय ४० रनको उत्कृष्ट शतकीय इनिङ खेलेका थिए । ओपनर इमरान बुटले २ सय ३६ बलमा ७ चौका सहित ९१ रन बनाए ।

आविद अली ६०, अजहर अली ३६, कप्तान बाबर आजम गोल्डेन डग आउट, मोहम्मद रिजवान ४५ र हसन अलीले ३० रनको योगदान दिए । जिम्बावेका मुर्जाबानीले ४, डोनाल्ड तिरिपानो ३ र रिचर्ड नगारावा २ विकेट लिए ।

त्यसअघि हरारे स्पोर्ट्स क्लबमा टस जितेर पहिला ब्याटिङ थालेको जिम्बावे पहिलो इनिङमा ५९.१ ओभरमा १ सय ७६ रनमा अल आउट भएको थियो । जिम्बावेका रोय कायाले ९४ बलमा ७ चौका सहित सर्वाधिक ४८ रनको योगदान दिए । मिल्टन शुम्बाले २७ र तिरिपानोले २८ रनको योगदान दिए । पाकिस्तानका हसन अली र शाहिन अफ्रिदीले ४–४ विकेट लिए ।

दोस्रो टेष्ट मे ७ देखि सुरु हुने छ ।