एजेन्सी – ओपनर जस बटलरको सानदार शतकमा राजस्थान रोयल्सले इन्डियन प्रिमियर लिग (आइपिएल) २०२१ को २८ औं खेलमा सनराइजर्स हैदराबादलाई २ सय २१ रनको लक्ष्य दिएको छ ।

अरुण जेटली स्टेडियम दिल्लीमा टस हारेर ब्याटिङ थालेको राजस्थानले निर्धारित २० ओभरमा ३ विकेट गुमाउँदै २ सय २० रन बनायो । सुरुवाती १० ओभरमा १ विकेट गुमाउँदै ७७ रन बनाएको राजस्थानले अन्तिम १० ओभरमा २ विकेट गुमाउँदै १सय ४३ रन बनाएपछि विशाल योगफल बनाएको हो ।

राजस्थानलाई विशाल लक्ष्यमा पुर्याउन ओपनर जस बटलरले ६४ बलमा ११ चौका र ८ छक्का सहित सर्वाधिक १ सय २४ रनको सर्वोत्कृष्ट शतकीय इनिङ खेले । बटलरले विजय शंकरको १७ औं ओभरको अन्तिम बलमा एक रन बटुल्दै आइपिएल र टि२० करिअर दुबैको पहिलो शतक पूरा गरेका थिए । बटलरले ५६ बलमा १० चौका र ५ छक्का सहित शतक पूरा गरेका थिए ।

सुरुवाती संयमित ब्याटिङ गरेका बटलरले ३९ बलमा अर्धशतक पूरा गरेका थिए । थप १७ बलमा ५० रन बनाउँदै बटलरले टि२० करिअरको पहिलो सानदार शतक प्रहार गरेका थिए । बटलर सन्दीप शर्माको १९ औं ओभरको अन्तिम बलमा बोल्ड आउट भएका थिए । राजस्थानका लागि यो कुनैपनि ब्याट्सम्यानले एक खेलमा बनाएको सर्वाधिक रन हो । यसअघि सन्जु स्यामसनले पन्जाब किंग्सविरुद्ध यसै सिजनमा १ सय १९ रनको उत्कृष्ट शतकीय इनिङ खेलेका थिए ।

राजस्थानलाई ओपनर यशस्वी जैसवाल र जस बटलरले पहिलो विकेटका लागि ३ ओभरमा १७ रनको साझेदारी गरेका थिए । स्पिनर राशिद खानले जैसवाललाई १२ रनमा एलबिडब्लू आउट गरे । जैसवालले १३ बलमा २ चौका प्रहार गरे । दोस्रो विकेटका लागि सञ्जु र बटलरले ८८ बलमा १ सय ५० रनको उत्कृष्ट साझेदारी गरेपछि बलियो योगफलमा पुगेको थियो ।

विजय शंकरको १७ औं ओभरको चौथो बलमा स्यामसनले ठूलो सट खेलेपनि लङअफमा अब्दुल सामदले उत्कृष्ट जम्पकासाथ साझेदारीमा ब्रेक लगाएका थिए । कप्तान सञ्जु स्यामसनले ३३ बलमा ४ चौका र २ छक्का सहित ४८ रनको योगदान दिए । सन्जु स्यामसनले ब्यक्तिगत २३ रनमा जीवनदान पाएका थिए ।

सन्दीप शर्माको नवौं ओभरको दोस्रो बलमा ठूलो सट खेलेका स्यमसन लङअफमा मनिष पाण्डेले क्याच ड्रप गर्न पुगेका थिए । युवा ब्याट्सम्यान रियान पराग १५ र डेविड मिलर ७ रनमा अविजित रहे । हैदराबादका विजय शंकर, सन्दीप शर्मा र राशिद खानले १–१ विकेट लिए ।