एजेन्सी – कप्तान मयंक अग्रवालको उत्कृष्ट ब्याटिङमा पन्जाब किंग्सले इन्डियन प्रिमियर लिग (आइपिएल) २०२१ को २९ औं खेलमा दिल्ली क्यापिटल्सलाई १ सय ६७ रनको लक्ष्य दिएको छ ।

नरेन्द्र मोदी स्टेडियम अहमदाबादमा टस हारेर ब्याटिङ थालेको पन्जाबले निर्धारित २० ओभरमा ६ विकेट गुमाउँदै १ सय ६६ रन बनायो । पन्जाबका कप्तान मयंक अग्रवालले ५८ बलमा ८ चौका र ४ छक्का सहित सर्वाधिक ९९ रनमा अविजित रहे । अग्रवालले आवेश खानलाई चौथो चौका, पाँचौं बलमा छक्का र अन्तिम बलमा चौका प्रहार गरेपनि शतक बनाउन १ रनले चुकेका थिए ।

नियमित कप्तान लोकेश राहुललाई एपेन्डिसाइटिसको कारण अस्पतालमा हुँदा अग्रवालले नेतृत्व गरि रहेका छन् । ओपनर तथा विकेटकिपर प्रभसिम्रनसिंहलाई कागिसो रबाडाले चौथो ओभरको चौथो बलमा स्टिभ स्मिथबाट १२ रनमा क्याच आउट गराउँदै दिल्लीलाई पहिलो सफलता दिलाए । रबाडालेनै छैटौं ओभरको दोस्रो बलमा क्रिस गेललाई १३ रनमा बोल्ड आउट गरेका थिए । गेलले ९ बलमा १ चौका र १ छक्का प्रहार गरे ।

तेस्रो विकेटका लागि डेब्यू गरेका डेविड मलान र अग्रवालले ४७ बलमा ५२ रनको साझेदारी गरेका थिए । १४ औं ओभरको पहिलो बलमा अक्षर पटेलले मलानलाई २६ रनमा बोल्ड आउट गर्दै साझेदारी तोडेका थिए । मलानले २६ बलमा १ चौका र १ छक्का प्रहार गरे । एक बलपछि दीपक हुडा १ रनमा रन आउट भए । तालमेल नमिल्दा अग्रवाल र दीपक एकैतर्फ भाग्दा रन आउट हुन पुगेका थिए ।

शाहरुख खान ४ रनमा क्याच आउट भए । हरप्रीत बार ४ रनमा अविजित रहे । दिल्लीका कागिसो रबाडाले ४ ओभरमा ३६ रन खर्चेर ३ विकेट लिए । अक्षर पटेल र आवेश खानको नाममा १–१ विकेट रह्यो ।