एजेन्सी – श्रीलंकाले बंगलादेशसँगको दोस्रो टेष्ट खेलमा सानदार जित निकालेको छ । दोस्रो टेष्ट खेलमा २ सय ९ रनको फराकिलो जितसँगै श्रीलंकाले दुई टेष्ट सिरिज १–० ले जितेको छ । जितका लागि ४ सय ३७ रनको विजयी लक्ष्य पछ्याएको बंगलादेश दोस्रो इनिङमा ७१ ओभरमा २ सय २७ रनमा अल आउट भयो ।

बंगलादेशका मुश्फिकुर रहिमले ६३ बलमा ५ चौका सहित सर्वाधिक ४० रनको योगदान दिए । मेहदी हसनले ३९, कप्तान मोमिनुल हक ३२, सैफ हसन ३४, तमिम इकवाल २४ र नाज्मुल सान्टो २६ रनमा आउट भए । श्रीलंका युवा स्पिनर तथा डेब्यू खेल खेलेका प्रविन जयविक्रमले सर्वाधिक ५ विकेट लिए । अर्का स्पिनर रमेश मेन्डिसले ४ र धनञ्जय डी शिल्भाले १ विकेट लिए ।

पहिलो इनिङमा २ सय ४२ रनको फराकिलो अग्रता लिएको श्रीलंकाले दोस्रो इनिङमा १९४–९ को अवस्थामा इनिङ समाप्तिको घोषणा गर्दै बंगलादेशलाई बलियो लक्ष्य दिएको थियो । श्रीलंका कप्तान दिमुथ करुणारत्नेले सर्वाधिक ६६ रनको योगदान दिए । धनञ्जय डी शिल्भा ४२, पाथुम निसंका र निरोसन डिक्वेलाले २४–२४ रन बनाए । बंगलादेशका ताइजुल ईस्लामले सर्वाधिक ५ विकेट लिए ।

पहिलो इनिङमा बंगलादेश २ सय ५१ रनमा अल आउट भएको थियो । ओपनर तमिम इकवालले १ सय ५० बलमा १२ चौका सहित सर्वाधिक ९२ रनको योगदान दिएका थिए । मोमिनुल ४९ र रहिमले ४० रन बनाए । अन्यले राम्रो रन बनाउन सकेनन् । प्रविन जयव्रिकमले ६ विकेट लिएका थिए ।

रमेश मेन्डिस र सुरुगा लकमलले २–२ विकेट लिए । त्यसअघि पहिला ब्याटिङ थालेको श्रीलंकाले पहिलो इनिङमा ४९३–७ को अवस्थामा इनिङ समाप्तिको घोषणा गरेको थियो । श्रीलंका ओपनर लाहिरु थिरिमानेले २ सय ९८ बलमा १५ चौका सहित १ सय ४० रनको शतकीय इनिङ खेलेका थिए ।

दिमुथ करुणारत्नेले १ सय ९० बलमा १५ चौका सहित १ सय १८ रन बनाएका थिए । पहिलो विकेटका लागि दिमुथ र लाहिरुले २ सय ९ रनको उत्कृष्ट दोहोरो शतकीय साझेदारी गरेका थिए । तल्लोक्रममा निरोशन डिक्वेवाले ७७ रन बनाए ।

बंगलादेशका तस्किन अहमदले सर्वाधिक ४ विकेट लिएका थिए । पहिलो टेष्ट बराबरीमा सकिएको थियो । २२ वर्षिय प्रविन जयविक्रमले पहिलो इनिङमा ६ र दोस्रो इनिङमा ५ गरि कुल ११ विकेट लिदै प्लेयर अफ द म्याच चुनिए । दुबै खेलमा सानदार शतक प्रहार गरेका कप्तान दिमुथ प्लेयर अफ द सिरिज चुनिए ।