एजेन्सी – आइसिसी विश्व टेष्ट च्याम्पियनसिप २०१९/२१ को फाइनल आगमी जुनमा इंग्ल्यान्डको साउथह्याप्टनमा हुँदैछ । नौ देशबीच दुई बर्षसम्म चलेको च्याम्पियनसिपको अंक तालिकामा भारत शीर्ष र न्युजिल्यान्ड दोस्रो स्थानमा हुँदै फाइनलमा स्थान बनाएका हुन् । विश्व टेष्ट वरियताका शीर्ष यी दुई टोलीबीच प्रतिस्पर्धा उच्च हुने अपेक्षा गरिएको छ ।

सन् २०१९ देखि सुरु भएको विश्व टेष्ट च्याम्पियनसिपमा आइसिसीका विश्व वरियतामा शीर्ष ९ टोलीले प्रतिस्पर्धा गरेका थिए । इंग्ल्यान्ड र अष्ट्रेलिया जस्ता देशले भने फाइनलमा स्थान बनाउन सकेनन् । दुई महिना अघि भारतसँगको चार टेष्ट सिरिज ३–१ ले गुमाएको इंग्ल्यान्ड घरेलु मैदानमा हुने फाइनलमा दर्शक बन्नेछ ।

कोरोनाका कारण दक्षिण अफ्रिकासँग सिरिज स्थगित हुँदा अष्ट्रेलियाले पनि फाइनलमा स्थान बनाउन सकेन । फाइनलमा पुग्न नसकेपनि ब्याटिङ र बलिङ दुवैमा अष्ट्रेलिया खेलाडी शीर्षस्थानमा रहे । बलिङमा तीव्र गतिका बलर प्याट कमिन्स ७० विकेटका साथ शीर्ष स्थानमा रहे । विश्व टेष्ट च्याम्पियनसिपमा एकै खेलमा सर्वाधिक रन बनाउने खेलाडी अष्ट्रेलिया डेविड वार्नर बने । वार्नरले २०१९ मा पाकिस्तानविरुद्ध ३ सय ३५ रनको अविजित इनिङ खेलेका थिए ।

एकै इनिङमा सर्वाधिक रन न्युजिल्यान्डले पाकिस्तानविरुद्ध गत जनवरीमा ६ सय ५९ रन बनाएको थियो । विश्व क्रिकेटका चर्चित ब्याट्सम्यान विराट कोहली, बाबर आजम, डेविड वार्नर, केन विलियम्सन जस्ता खेलाडी शीर्ष पाँचमा अट्न सकेनन् । फाइनल अघि विश्व टेष्ट च्याम्पियनशिपमा सर्वाधिक रन बनाउने ५ ब्याट्सम्यान यस प्रकार छन् ।

५ .अजिक्या रहाने – १ हजार ९५ रन

भारतबाट विश्व टेष्ट च्याम्पियनसिपमा सर्वाधिक रन बनाउने खेलाडी उपकप्तान अजिक्या रहाने बने । अजिक्या रहानेले १७ खेलमा २८ इनिङमा ब्याटिङ गर्दै रहानेले तीन शतक र ६ अर्धशतक सहित कुल १ हजार ९५ रन बनाए । उत्कृष्ट प्रदर्शन १ सय १५ रन रह्यो । कुल १ सय २५ चौका र ६ छक्का प्रहार गरे । गत डिसेम्बरमा अष्ट्रेलियालाई ८ विकेटले पराजित गर्न रहानेले पहिलो इनिङमा १ सय १२ रनको कप्तानी इनिङ खेलेका थिए ।

४. बेन स्टोक्स – १ हजार ३ सय ३४ रन

इंग्ल्यान्डका वर्तमान समयका विश्व क्रिकेटकै सर्वोत्कृष्ट अलराउन्डर बेन स्टोक्स सर्वाधिक रन बनाउने चौथो खेलाडी हुन् । स्टोक्सले १७ खेलको ३२ इनिङमा ब्याटिङ गर्दै ४ शतक र ६ अर्धशतक सहित कुल १ हजार ३ सय ३४ रन बनाए । उनले कुल १ सय ४२ चौका र ३१ छक्का सामेल रह्यो । विश्व टेष्ट च्याम्पियनशिपमा सर्वाधिक छक्का प्रहार गर्ने खेलाडी समेत हुन् ।

उत्कृष्ट प्रदर्शन १ सय ७६ रन रह्यो । उक्त इनिङ वेस्टइन्डिजविरुद्ध गत जुलाईमा खेलेका थिए । स्टोक्सले विश्व टेष्ट च्याम्पियनशिप अन्तर्गत २०१९ अगष्टमा अष्ट्रेलियासँग तेस्रो टेष्ट खेलमा इंग्ल्यान्डलाई १ विकेटको जित दिलाउन खेलेको १ सय ३५ रनको इनिङ सर्वोत्कृष्ट र एक यादगार मानिन्छ ।

३. स्टिभ स्मिथ – १ हजार ३ सय ४१ रन

अष्ट्रेलिया प्रमुख ब्याट्सम्यान स्टिभ स्मिथ सर्वाधिक रन बनाउने खेलाडीको सूचिमा तेस्रो स्थानमा छन् । स्मिथले १३ खेलको २२ इनिङमा ब्याटिङ गर्दै कुल १ हजार ३ सय ४१ रन बनाएका थिए । जसमा ४ शतक र ७ अर्धशतक सामेल रह्यो । स्मिथले १ सय ५१ चौका र ७ छक्का प्रहार गरे । स्मिथको उत्कृष्ट प्रदर्शन २ सय ११ रह्यो । स्मिथले २०१९ सेप्टेम्बरमा इंग्ल्यान्डविरुद्ध म्यानचेस्टरमा ३ सय १९ बलमा २४ चौका र २ छक्का सहित २ सय १२ रनको दोहोरो शतकीय इनिङ खेलेका थिए ।

२. जो रुट – १ हजार ६ सय ६० रन

विश्व टेष्ट च्याम्पियनसिपमा इंग्ल्यान्डका कप्तान जो रुटले सर्वोत्कृष्ट प्रदर्शन गर्दै दोस्रो स्थानमा रहे । रुटले २० खेलमा ३७ इनिङमा ब्याटिङ गर्दै कुल १ हजार ६ सय ६० रन बनाए । जसमा ३ शतक र ८ अर्धशतक सामेल छ । रुटले दुई दोहोरो शतक प्रहार गरे । कुल १ सय ६८ चौका र ८ छक्का प्रहार गरे । उत्कृष्ट प्रदर्शन २ सय २८ रन रह्यो । रुटले गत जनवरीमा श्रीलंकाविरुद्ध उक्त इनिङ खेलेका थिए । त्यस्तै रुटले भारतविरुद्ध गत फेब्रुअरीमा २ सय १५ रनको उत्कृष्ट इनिङ खेलेका थिए ।

१. मार्नस लाबुसेन– १ हजार ६ सय ७५ रन

अष्ट्रेलियाका युवा ब्याट्सम्यान मार्नस लाबुसेन विश्व टेष्ट च्याम्पियनशिपमा सर्वाधिक रन बनाउने खेलाडीको सूचिमा शीर्ष स्थानमा रहे । लाबुसेनले १३ खेलमा २३ इनिङमा कुल १ हजार ६ सय ७५ रन बनाएका छन् । जसमा ५ शतक र ९ अर्धशतक सामेल रह्यो । लाबुसेनले कुल १ सय ८६ चौका र ३ छक्का प्रहार गरे । उत्कृष्ट प्रदर्शन २ सय १५ रन रह्यो । उक्त इनिङ लाबुसेनले २०२० मा सिड्नीमा न्युजिल्यान्डविरुद्ध खेलेका थिए ।