एजेन्सी – ओपनर आबिद अलीको कीर्तिमानी दोहोरो शतकको सहयोगमा पाकिस्तानले जिम्बावेसँगको दोस्रो टेष्ट खेलमा विशाल योगफल बनाएको छ । हरारे स्पोर्ट्स क्लबमा टस जितेर ब्याटिङ थालेको पाकिस्तानले दोस्रो दिन पहिलो इनिङ १४७.१ ओभरमा ८ विकेटको क्षतिमा ५ सय १० रन बनाउँदै इनिङ समाप्तिको घोषणा गरेको थियो ।

पाकिस्तानका ओपनर आबिद अली ४ सय ७ बलमा २९ चौका सहित २ सय १५ रनमा अविजित रहे । आबिदको यो टेष्ट करिअरको पहिलो दोहोरो शतक हो । आबिद पाकिस्तानबाट जिम्बावेविरुद्ध टेष्ट क्रिकेटमा एकै इनिङमा सर्वाधिक रन बनाउने ब्याट्सम्यान पनि बनेका छन् । यसअघि पाकिस्तानबाट जिम्बावेविरुद्ध सर्वाधिक रन युनिस खानले २ सय अविजित इनिङ खेलेका थिए ।

दोस्रो दिन आबिद अलि र स्पिनर नौमान अलीले आठौं विकेटका लागि १ सय ६९ रनको उत्कृष्ट साझेदारी गरेका थिए । आक्रामक ब्याटिङ गरेका नौमानले १ सय ४ बलमा ९ चौका र ५ छक्का सहित ९७ रनको इनिङ खेलेका थिए । स्टम्पिङ आउट हुँदा आफ्नो करिअरकै पहिलो शतक बनाउन तीन रनले चुकेका थिए ।

त्यसअघि पहिलो दिन अजहर अलीले २ सय ४० बलमा १७ चौका र १ छक्का सहित १ सय २६ रन बनाउँदै क्याच आउट भएका थिए । अजहरको यो टेष्ट करिअरको १८ औं टेष्ट शतक हो । १२ रन जोड्दानै पहिलो विकेट गुमाएको पाकिस्तानलाई दोस्रो विकेटका लागी अजहर र आबिदले २ सय ३६ रनको दोहोरो शतकीय साझेदारी गर्दै बलियो योगफलमा पुर्याएका थिए ।

पाकिस्तानको मध्यक्रम ब्याटिङ भने चल्न सकेन । ओपनर इमरान बुट र कप्तान बाबर आजम भने २–२ रनमै क्याच आउट हुन पुगे । फवाद आलमलाई मुर्जाबानीले ५ रनमा बोल्ड आउट गरे । सजिद खान २० र मोहम्मद रिजवान २१ रनमा आउट भए । जिम्बावेका तीव्र गतिका बलर मुर्जाबानीले सर्वाधिक ३ विकेट लिए । त्यस्तै टेन्डाई चिसोरोले २, डोनाल्ड तिरीपानो, ल्यूक जोंगवे र रिचर्ड नगारावा १- १ विकेट लिए ।

दोस्रो दिन पहिलो इनिङ थालेको जिम्बावेले ३० ओभरमा ४ विकेट गुमाउँदै ५२ रन बनाएको छ । जिम्बावेका रेगिस चकब्वा ७१ बलमा ४ चौका सहित २८ रनमा अविजित छन् । ४ सय ५८ रनले पछि परेको जिम्बावेलाई फलोअनको डर रहेको छ । पाकिस्तानका हसन अली, शाहिन अफ्रिदी, सजिद खान र तबिस खानले १-१ विकेट लिए । पहिलो टेष्ट खेलमा १ सय १६ रनको इनिङ अन्तरले पराजित गर्दै पाकिस्तानले दुई टेष्ट सिरिजमा १–० को अग्रता लिएको छ ।