काठमाडौं (हाम्रो खेलकुद) – पाकिस्तानका कप्तान बाबर आजमले नेपाली राष्ट्रिय क्रिकेट टोलीका ओपनर कुशल भुर्तेल र ओपनर फखार जमानलाई पछि पार्दै आईसिसीको ‘प्लेयर अफ द मन्थ’ अवार्ड जितेका छन् ।

आइसिसीले अप्रिल महिनामा उत्कृष्ट प्रदर्शन गर्ने कुशलसँगै पाकिस्तानका कप्तान बाबर आजम र फखार जमान मनयोनमा परेका थिए । पाकिस्तानका कप्तान बाबर आजमले दक्षिण अफ्रिकासँग ओडिआई र टि२० आई सिरिज जिताउन उत्कृष्ट प्रदर्शन गरेका थिए । त्यसैको आधारमा उनले अवार्ड जितेका छन् । यस अवार्डको विजेता आइसीसीकै प्यानल र खुला मतदानको मत अनुसार घोषणा गरिएको हो । आइसीसीको प्यानलमा पूर्व खेलाडी, पत्रकार तथा ब्रोडकास्टरको उपस्थिति थियो । आइसीसी प्यानलको मतभार ९० प्रतिशत र खुला मतदानको १० प्रतिशत भार हुनेछ । दुवै जोडेर सर्वाधिक मत बाबरले पाएका हुन् ।

क्षक्षिण अफ्रिकासँग अप्रिल २ मा पहिलो ओडिआई खेलमा पाकिस्तानलाई ३ विकेटले जिताउन बाबरले १ सय ३ रनको शतकीय इनिङ खेलेका थिए । तेस्रो तथा निर्णायक ओडिआई खेलमा ९४ रनको महत्वपूर्ण इनिङ खेलेका थिए । त्यस्तै टि२० आई खेलमा दक्षिण अफ्रिकाले २ सय ४ रनको विशाल लक्ष्य दुई ओभर अगाडिनै पूरा गर्नेक्रममा १ सय २२ रनको कीर्तिमानी इनिङ खेलेका थिए ।

कुशलले अघिल्लो साता नेपालको टि२० आई टोलीबाट डेब्यू गर्दै विश्व कीर्तिमानी प्रदर्शन गरेका थिए । नेपाललाई त्रिकोणात्मक टि२० सिरिजको उपाधि दिलाउन कुशलले उत्कृष्ट प्रदर्शन गरेका थिए । जसक्रममा उनले डेब्यू सहित लगातार तीन खेलमा अर्धशतक प्रहार गर्दै विश्व कीर्तिमान बनाएका थिए । कुशल सुरुवाती तीन खेलमा लगातार अर्धशतक प्रहार गर्ने पहिलो टि२० आई खेलाडी समेत हुन् ।

कुशलले नेदरल्यान्ड्सको खेलमा डेब्यू गर्दै ६२ रन बनाएका थिए । दोस्रो खेलमा मलेसियाविरुद्ध ६१ रन बनाएका थिए । यी दुवै खेलमा नेपालले ९–९ विकेटले सहजै जितेको थियो । तेस्रो खेलमा नेदरल्यान्ड्सँग कुशलले ६२ रन बनाउँदै लगातार तेस्रो अर्धशतक प्रहार गरेका थिए । उक्त खेलमा नेपाल पराजित भएको थियो । चौथो खेलमा मलेसियासँग १६ र फाइनलमा नेदरल्यान्ड्ससँग ७७ रन बनाएका थिए । फाइनलमा नेपालले नेदरल्यान्ड्सलाई १ सय ४२ रनको फराकिलो अन्तरले हराउँदै उपाधि जितेको थियो ।

अर्का ओपनर फखर जमानले पनि दक्षिण अफ्रिकासँग दोस्रो र तेस्रो ओडिआई खेलमा लगातार शतक प्रहार गरेका थिए । दक्षिण अफ्रिकासँग दोस्रो ओडिआई खेलमा ३ सय ४२ रनको विशाल लक्ष्य पछ्याउनेक्रममा पाकिस्तान १७ रनले पराजित भएपनि जमानले १ सय ९३ रनको उत्कृष्ट शतकीय इनिङ खेल्दै धेरैको मन जितेका थिए । तेस्रो ओडिआई खेलमा १ सय १ रनको उत्कृष्ट शतकीय इनिङका साथ सिरिज जिताएका थिए ।