काठमाडौँ (हाम्रो खेलकुद) – भलिबलमा नयाँ प्रतिभाशाली खेलाडी र उमेर समूहका खेलाडी उत्पादन गर्ने उद्देश्यसहित नेपाल विद्यालय भलिबल कमिसन गठन भएको छ । नेपाल भलिबल संघले रामबहादुर केसीको अध्यक्षतामा १० सदस्यीय कमिसनको तदर्थ समिति गठन गरेको संघले आइतबार पत्रकार सम्मेलनमार्फत सार्वजनिक गरेको छ । अध्यक्ष केसी न्यूटन स्कुलका प्रिन्सिपल हुन् ।
कमिसनको उपाध्यक्षमा न्यू डायमण्ड एकेडेमिका प्रिन्सिपल एवंम प्रशिक्षक कुमार राई र हिमचुली एकेडेमीका निर्देशक युवराज श्रेष्ठ छन् । त्यस्तै सचिवमा हिमरश्मी हाइस्कुलका प्रिन्सिपल लोकेन्द्र खड्का, कोषाध्यक्षमा सेब स्कुलका प्रिन्सिपल युवराज थापा छन् । अरुणदय स्कुलका प्रिन्सिपल भिमसेन केसी, मनास्लु उच्च माविका प्रिन्सिपल भक्त कुमार श्रेष्ठ, ज्ञानसुधा एकेडेमीका प्रिन्सिपल प्रमोद जिसी, टप्स स्कुल पोखराका प्रिन्सिपल रत्न गुरुङ र सेन्ट डेबिस एकेडेमीका खेलुकुद प्रमुख अम्बिका वली कमिसनको सदस्य छन् ।
क्राउन प्लाजामा आयोजित कार्यक्रममा संघका अध्यक्ष मनोरञ्जनरमण शमाले कमिसनका पदाधिकारी र सदस्यलाई सपथ गराएका थिए । संघका उपाध्यक्षत्रय यम गुरुङ ,निरोज मास्के र रञ्जन खड्का , महासचिव जितेन्द्रबहादुर चन्द र सचिव मनवीर छन्त्यालले कमिसनका पदाधिकारी र सदस्यलाई प्रमाणपत्र प्रदान गरे । प्रादेशिक संरचना अनुसार कमिसनका पाँच उपाध्यक्ष पछि मनोयन गरिने संघले जनाएको छ ।
कमिसनका अध्यक्ष केसीले संघले दिएको जिम्मेवारीका लागि धन्यवाद दिदै राष्ट्रिय टोलीलाई लक्षित गरि खेलाडी उत्पादन ध्यान दिने बताए । संघले भलिबल कमिसन सञ्चालनका लागि विद्यालय भलिबल कमिशन निर्देशिका र कार्यदिशा तयार पारेको छ । तथर्द समितिले विद्यालयस्तरमा भलिबल खेललाई बृहत रुपमा विस्तार गर्न जिल्ला भलिबल कमिसन गठन गर्ने जनाएको छ ।
