काठमाडौं (हाम्रो खेलकुद) – कतार एयरवेज ओपन गल्फ प्रतियोगिता यसै साता गोकर्ण गल्फ क्लब हुनेछ । लगातार छैटौं बर्ष हुन लागेको प्रतियोगिता यसपटक शुक्रबार र शनिबार दुई दिन हुनेछ । नेपालको एमेच्योर गल्फ प्रतियोगितामध्येको एक प्रतियोगितालाई कतार एयरवेजले प्रायोजन गर्दै आएको छ । सन् २००३ मा भने कतार एयरवेज सह प्रायोजकका रुपमा रहेको थियो ।
१८ होलमा ३/४ स्टेबल फोर्ड ह्यान्डिक्यापमा हुने प्रतियोगितामा महिला,पुरुष, जुनियर, सिनियर गरि झन्डै सय खेलाडीको सहभागिता रहने मंगलबार आयोजित पत्रकार सम्मेलनमा गोकर्ण फरेस्ट गल्फ क्लबका वरिष्ठ निर्देशक दीपक आचार्यले जानकारी दिए । जुनियर र महिलाको प्रतिस्पर्धा पहिलो दिन शुक्रबार र बाँकी प्रतिस्पर्धा शनिबार हुनेछ । प्रतियोगिताका विजेताले स्कटल्यान्डको इडिनबुर्गको दुईतर्फी हवाई टिकट प्राप्त गर्नेछन् । त्यस्तै बेस्ट ग्रस, उपविजेता, महिला विजेता, महिला उपविजेता, सिनियर, जुनियर विजेता, लंगेस्ट ड्राइभ, क्लोजेस्ट टु द पिन, मस्ट बर्डिले पुरस्कार प्राप्त गर्नेछन् । कतार एयरवेजका कन्ट्री मेनेजर जयप्रका नायरले गोकर्ण फरेस्ट रिसर्टको सहकार्यमा गल्फ आयोजना गर्दा खुसी लागेको बताए ।
