एजेन्सी – पाँच पटकको च्याम्पियन मुम्बई इन्डियन्सले इन्डियन प्रिमियर लिग (आइपिएल) २०२२ मा आफ्नो इतिहासकै खराब प्रदर्शन गर्दै बाहिरियो । मुम्बईमात्र होईन कप्तान रोहित शर्माले पनि आइपिएल करिअरकै खराब प्रदर्शन गरे ।
मुम्बई १४ खेलमा १० मा हार र ४ मा जितका साथ ८ अंकका साथ पुछारमा रहेर बाहिरियो । मुम्बई पहिलो पटक पुछारमा रहेर बाहिरिएको हो । यसअघि मुम्बई २००९ मा सातौं स्थानमा रहँदै बाहिरिएको थियो । त्यसपछि मुम्बई पाँचौं स्थान भन्दा तल खस्किएको थिएन । मुम्बई २०१३, २०१५, २०१७, २०१९ र २०२० को च्याम्पियन टोली हो ।
रोहितले यस सिजमा १४ खेलमा २ सय ६८ रन मात्र बनाए । जुन करिअरको खराब प्रदर्शन थियो । यस सिजनमा रोहितको उच्च प्रदर्शन ४८ रन थियो । रोहित पहिलो पटक एक सिजनमा अर्धशतक विहीन बने । २००८ देखिनै आइपिएल खेल्दै आएका रोहितको यसअघि खराब प्रदर्शन २०१८ मा थियो ।
२०१८ मा रोहितले १४ खेलमा २ सय ८६ रन बनाएका थिए । जसक्रममा रोयल च्यालेन्जर्स बेंगलोरविरुद्ध ९४ रनको इनिङ खेलेका थिए । त्यस बाहेक सिजनमा रोहितको ३ सय भन्दा कम रन बनाएका छैनन् । रोहितले २०१३ मा १९ खेलमा ४ अर्धशतक सहित ५ सय ३८ रन बनाएका थिए ।
आइपिएलमा लिगका खेलहरु सकि सकेका छन् । पहिलो क्वालिफायरमा शीर्षस्थानको गुजरात टाइटन्स र दोस्रो स्थानको राजस्थान रोयल्सबीच मंगलबार इडेन गार्डेन कोलकातामा खेल हुनेछ । विजेता टोली फाइनलमा पुग्दा पराजित हुने टोलीले एलिमिनेटरको विजेतासँग दोस्रो क्वालिफायर खेल्न पाउनेछ ।
बुधबार तेस्रो स्थानको लखनऊ सुपर जायन्ट्स र चौथो स्थानको बेंगलोरबीच प्रतिस्पर्धा हुनेछ । शुक्रबार दोस्रो क्वालिफायर हुनेछ । आइतबार अहमदाबादमा फाइनल हुनेछ ।
