ह्युस्टन, अमेरिका (हाम्रो खेलकुद) – आइसिसी विश्वकप लिग–२ त्रिकोणात्मक ओडिआई सिरिजमा घरेलु टोली अमेरिकाविरुद्ध नेपाललाई पहिलो झड्का लागेको छ । ह्युस्टनस्थित मुसा क्रिकेट स्टेडियममा टस जितेर पहिला ब्याटिङ रोजेको नेपालले १२ ओभरमा १ विकेट गुमाउँदै ५६ रन बनाएको छ ।

पहिलो विकेटका लागि चोटबाट फर्किएका दुबै ओपनर आसिफ शेख र कुशल भुर्तेलले ११.५ ओभरमा ५६ रनको अर्धशतकीय साझेदारी गर्दै नेपाललाई राम्रो सुरुवात दिलाए ।

नेपालका आसिफ शेख ३६ बलमा ४ चौकासहित ३१ रनमा अविजित छन् । उनलाई देव खनालले साथ दिनेछन् । कुशल भुर्तेल ३६ बलमा १९ रनमा बोल्ड भए । निसर्ग पटेलको बलमा कुशल स्वीप सट खेल्ने धुनमा मिस हुँदा बोल्ड आउट हुन पुगे ।

नेपालले आजको खेलमा तीन परिवर्तन गरेको छ । विकेटकिपर विनोद भण्डारी, सुवास खकुरेल र सुनिल धमला बेन्चमा रहेका छन् । नेपालका पहिलो रोजाईका आसिफ शेख, कुशल भुर्तेल र आदिल अन्सारीलाई मौका दिएका छन् ।

आदिल अन्सारीको यो ओडिआईमा डेब्यू खेल हो । टि२० आईमा विष्फोटक क्षमता राख्ने आदिललाई नेपालले फिनिसरमा खेलाउने छ ।

नेपालको प्लेइङ ११ :

कुशल भुर्तेल, आसिफ शेख(विकेटकिपर), देव खनाल, दीपेन्द्रसिंह ऐरी, रोहित पौडेल, आरिफ शेख, आदिल अन्सारी, सोमपाल कामी, करण केसी, सन्दीप लामिछाने (कप्तान) र सुशान भारी ।