काठमाडौं (हाम्रो खेलकुद) – नेपाली राष्ट्रिय गल्फ टोलीका सदस्य तथा १३ औं सागका दोहोरो स्वर्णधारी सुभाष तामाङलाई भारतको तरुण सरदेशाई गल्फ एकेडेमीले छात्रवृत्ति प्रदान गर्ने भएको छ ।

नेपाल गल्फ संघको समन्वयमा गत महिना प्रशिक्षणका लागि सुभाष र अर्का युवा एमेच्योर सद्भाव आचार्य भारत पुगेका थिए । एसियाली खेलकुदको तयारीका लागि सुभाष गल्फ संघको खर्चमा तीन महिनाका लागि भारत पुगेका थिए । तर एकेडेमीले लामो समयसम्म सुभाषको प्रशिक्षण खर्च भने आफैं व्यहोर्ने जनाएको छ । सद्भाव भने परिवारकै खर्चमा दुई वर्ष अध्ययन र प्रशिक्षण गर्न पुगेका हुन् ।

भारतको तरुण सरदेशाई एकेडेमीले नै सुभाषको प्रतिभाबाट प्रभावित भएर उनको यात्रामा साथ दिन चाहेको बताएको छ । गरिब परिवारमा हुर्केका सुभाषको संघर्ष गाथा लेख्दै एकेडेमीले गल्फ संघसँग लामो सहकार्य गरेर अघि बढ्ने जनाएको छ । एकडेमीले संघका अध्यक्ष टासी घलेको खोजबाट अघि बढेका सुभाषलाई अब एकेडेमीले पनि उज्ज्वल भविष्यका लागि आफ्नो तर्फबाट सक्दो सहयोग गर्ने बताएको छ ।

सुभाष हाल विश्व वरीयतामा १ सय १२ स्थानमा रहेका छन् । उनले १३ औं सागमा दोहोरो स्वर्ण जित्दै कलिलो उमेरमा आफ्नो कौशल देखाएका थिए । उनी हाल एसियाली खेलकुदको तयारीमा जुटेका छन् । उनले सुर्य नेपाल गल्फ टुरमा थुप्रै एमेच्योर प्रतियोगिता जित्नुका साथै तीन पटक प्रो खेलाडीलाई पछि पार्दै मुख्य प्रतियोगिताकै उपाधि पनि जितेका छन् ।