पोखरा (हाम्रो खेलकुद) – त्रिभुवन आर्मी क्लबका सुभाष तामाङले नवौं राष्ट्रिय खेलकुद अन्तर्गत गल्फ एकलतर्फ अग्रता लिएका छन् ।

पोखरास्थित हिमालयन गल्फ कोर्षमा १३ अ‍ौं सागमा दोहोरो स्वर्ण विजेता सुभाषले बागमती प्रदेशका सद्भाव आचार्यलाई दुई स्ट्रोकले पछि पारे । पार ६९ को कोर्षमा सुभाषले १ अन्डर ६८ स्कोर बनाए । सद्भाव १ अ‍ोभर ७० स्कोरका साथ दोस्रो स्थानमा छन् । प्रदेश १ का युवराज भुजेलले २ अ‍ोभर ७१ स्कोर लेखाएका छन् ।

महिलातर्फ बागमती प्रदेशकी तारा कार्की चित्रकार र प्रदेश १ की सुष्मा सिग्देल अग्रतामा छन् । दुवै जनाले १२ अ‍ोभर ८१ स्कोर जोडेका छन् । बागमतीकी कश्मिरा शाह १५ अ‍ोभर ८४ स्कोरसहित तेस्रो स्थानमा छिन् ।

पुरुष टिमतर्फ बागमती प्रदेश २ सय १९ स्कोरसाथ शीर्षस्थानमा छ । टोलीमा सद्भाव, टासी छिरिङ, वाङचेन धन्दुप र नोर्बु छिरिङ शेर्पा छन् । सुभाषसँगै निश्चय रायमाझी, झलेन्द्र भट्टराई र विष्णु कार्की सम्मिलित आर्मी २ सय २३ अंकसाथ दोस्रो स्थानमा छ ।

महिलातर्फ कश्मिरा शाह, तारा कार्की चित्रकार र प्रतिभा राई सम्मिलित बागमती शीर्षस्थानमा छ । उनीहरुले १ सय ६५ स्कोर जोडेका छन् । दोस्रो स्थानमा सुष्मा, सुमित्रा लिम्बू र सम्झना ढकाल रहेको प्रदेश १ ले १ सय ७५ अंक जोडेको छ ।

प्रतियोगिताको अन्तिम १८ होल शनिबार हुनेछ । ५ पुरुष र ४ महिला टोलीले सहभागिता जनाएका छन् ।