काठमाडौं (हाम्रो खेलकुद) – विश्व प्रसिद्ध मोबाइल खेल प्लेयर ब्याटल अन्डरग्राउन्ड्स (पब्जी) को ग्लोबल च्याम्पियनसिप (पिएमजिसी) को समूह चरणको पहिलो दिन नेपालको द रियल सोल्जर्स (डीआरएस) गेमिङले औसत सुरुवात गरेको छ ।

समूह रातोमा परेको डीआरएसले पहिलो दिन शुक्रबार सुरुवाती ६ राउण्डको अन्त्यमा ४८ अंक जोड्दै सातौं स्थानमा रहेको छ । डीआरएसले एलिमिनेसनबाट १६ तथा स्थानको आधारमा ३२ अंक प्राप्त गरेको हो ।

डीआरएसले पहिलो दिन रक्षात्मक खेल खेल्दै औसत प्रदर्शन गरेको हो । सुरुवात राम्रो हुन नसकेपनि त्यसपछि लगातार शीर्ष ६ भित्र रहन सफल भयो । पहिलो राउण्डमा एक किलसहित १४ औं स्थानमा रहेको टोलीले दोस्रो राउन्डमा ४ किलसहित सातौं स्थान पायो ।

तेस्रो राउन्डमा ३ किलसहित दोस्रो, चौथोमा २ किलसहित पाँचौ र पाँचौ राउन्डमा ४ किलसहित चौथो भयो । अन्तिम राउन्डमा २ किलसहित टोली छैटौं स्थानमा रहयो ।

४ दिन संचालन हुने समूह चरणमा कुल २४ राउन्ड खेल हुनेछ । मलेसियाको कुआलालम्पुरमा भइरहेको समूह चरणबाट शीर्ष तीन टोलीले सिधै अन्तिम चरणमा स्थान बनाउने छन् । अन्तिम चरण अर्को वर्ष जनवरीमा जकार्तामा हुनेछ ।

त्यस्तै हरेक समूहबाट चौथो देखि ११ औं स्थान हासिल गर्ने टोलीले सर्भाइभल स्टेज खेल्दै फाइनल पुग्ने अर्को अवसर पाउनेछन् । हरेक समूहका पुछारका ५ टोली भने बाहिरिनेछन् । सहभागी ४८ टोलीलाई रातो, हरियो र निलो समूहमा विभाजन गरिएको छ । नेपालबाट स्काइलाइट्ज गेमिङ हरियो समूह र ट्रेन्ड टु किल (टि२के) पहेंलो समूहमा रहेका छन् ।

हाल समूहमा ब्राजिलको इन्फ्लुएन्स केमिन ९७ अंकसहित शीर्षस्थानमा छ । इराकको निग्मा ग्यालेक्सी (८३) र कजाकस्तानको टाइटन गेमिङ (७६) क्रमश: दोस्रो र तेस्रो छन् ।