प्रकाश तिमल्सिना
काठमाडौं – नेपाल एभिसी सेन्ट्रल जोन भलिबल च्याम्पियनसिपमा फेरी पदक विहिन भएको छ । बंगलादेशको ढाकामा जारी च्याम्पियनसिपको मंगलबार भएको तेस्रो स्थानको खेलमा माल्दिभ्ससँग ३–१ ले पराजित भएपछि नेपाल लगातार दास्रो बर्ष पदक विहिन भएर फर्कने भएको छ । गत बर्ष पहिलो सहभागितामा पनि नेपाल यहि अवस्थामा अफगानिस्तानसँग पराजित भएर फर्केको थियो ।
च्याम्प्यिनसिपको पहिलो खेलमा माल्दिभ्सलाई नै हराएको नेपाल आजको खेलमा भने सुरुआतबाटै पछि परेको थियो । कांस्य पदकका लागि भएको खेलमा नेपाल २२–२५,१४–२५,२५–१९ र २१–२५ ले पराजित भएको थियो । झन्डै ४० बर्षयता अन्तर्राष्ट्रिय प्रतियोगितामा भाग लिइरहेको नेपाल अहिले सम्म पदक जित्न असफल रहँदै आएको छ । तीन बर्षअघि अन्तर्राष्ट्रिय आमन्त्रणमा कास्य पदक जित्नुनै नेपालको अहिले सम्मको उच्च सफलता हो ।
