उत्सव शाक्य, काठमाडौं

शुक्रबार पार-६८ रोयल नेपाल गल्फ क्लबमा भएको सूर्य नेपाल च्यालेन्ज जितेर एमेच्योर गल्फर सद्भाव आचार्य प्रतिष्ठित सूर्य नेपाल गल्फ टुरको सबैभन्दा कान्छो च्याम्पियन बनेका छन् ।

१६ वर्ष १० महिनाको उमेरमा सद्भावले आफ्नो पहिलो ठूलो उपाधि जिते हालका शीर्ष एमेच्योर गल्फर सुभाष तामाङले राखेको अघिल्लो कीर्तिमान तोडे । सुभाषले यसअघि १६ वर्ष ११ महिनामा सूर्य नेपाल च्यालेन्ज जितेर सूर्य नेपाल गल्फ टुरको कान्छो च्याम्पियनको कीर्तिमान बनाएका थिए ।

सद्भावले सूर्य नेपाल गल्फ टुर २०२२-२३ को छैटौं इभेन्ट अन्तर्गत अन्तिम दिन चार अन्डर ६४ को प्रदर्शन गर्दै कुल तीन अन्डर २६९ को स्कोरसाथ उपाधि जिते । यो प्रदर्शन अघिल्लो दिन अग्रतामा रहेका तथा साविक विजेता भुवन नगरकोटीमाथि २ स्ट्रोकको जित हासिल गर्न पर्याप्त थियो ।

सद्भावले ६९, ६६, ७० र ६४ को प्रभावशाली प्रदर्शन गर्दै सबै व्यावसायिक गल्फरहरूलाई पछि पारे । अन्तिम दिन वर्षाले बाधा पुर्याएपनि सद्भाव १६ वर्षको उमेरमा व्यावसायिक गल्फ टुरको उपाधि जित्न सफल भए । “यस जितले मेरो मनोबल बढाएको छ, र म भविष्यमा हुने प्रतियोगिताहरु पनि जित्नेमा विश्वस्त छु,” उनले भने।

उनले थपे, “म आफ्नो प्रदर्शनबाट सन्तुष्ट छु । पहिलो पटक प्रो इभेन्टमा प्रो हरुलाई हराउनु र त्यो पनि अन्तिम दिनको अवस्थामा २ स्ट्रोकले जित्नु सहज थिएन ।”

सद्भावको गल्फप्रतिको प्रेम सानै उमेरमा सुरु भयो । बुबा दीपक आचार्य आफैं एक उत्कृष्ट व्यावसायिक गल्फर हुन् त् हजुरबुबाबाट पनि सद्भाव प्रेरित भए । “मैले गल्फ खेल्न सुरु गर्दा ४ वर्षको थिएँ,” उनले आफ्नो सुरुका दिनहरू सम्झी ।

सद्भावले ११ वर्षको उमेरदेखि व्यावसायिक गल्फर बन्ने चाहना राखेका थिए । “मेरो बुवाले मलाई ११ वर्षको हुँदा मास्टर्स प्रतियोगितामा टाइगर वुड्सले ग्रिन बाहिरबाट चिप गरेको भिडियो देखाउनुभयो र त्यसपछि मलाई व्यावसायिक गल्फर बन्न प्रेरित गर्यो । टाइगर वुड्सले मलाई प्रेरणा दिनुभयो, र म ठूलो भएपछि उनको स्तर पार गर्ने आशा गर्छु, ”सद्भावले आफ्नो भविष्यका योजनाहरूको बारेमा सोध्दा जवाफ दिए ।

बाल्यकालमा सद्बाव आफ्ना आमाबाबुसँग फुर्सदको लागि गल्फ कोर्स जान्थे। तर, बिस्तारै उनको खेलप्रति लगाव बढ्दै गयो । “मेरा आमाबाबुले मलाई गल्फ कोर्समा रमाइलोको लागि मात्र लैजानुहुन्थ्यो, तर मैले यसलाई गम्भीरतापूर्वक लिन थालेँ र खेललाई माया गर्न थालें । वहाँहरूले पनि मेरो निर्णयलाई समर्थन गर्नुभयो र मैले भविष्यमा यसलाई क्यारियरको रूपमा पछ्याउने निर्णय गरें, ”सद्भावले गल्फप्रति आफ्नो स्नेहबारे बताए ।

सद्भावले १४ वर्षको उमेरमा सूर्य नेपाल गल्फ टुरमा डेब्यु गरेका थिए । मार्च २०२१ मा सूर्य नेपाल सेन्ट्रल ओपनमा प्रतिस्पर्धा गरेका थिए । उनले अहिलेसम्म टुरको आठ इभेन्टमा भाग लिएका छन् । सद्भावलाई पहिलो क्यारियर उपाधि जित्न धेरै समय लागेन । उनले दुई साता अघि मात्र पहिलो एमेच्योर उपाधि जितेका थिए । सूर्य नेपाल गल्फ टुर २०२२-२३ को पाँचौं प्रतियोगिता सूर्य नेपाल सेन्ट्रल ओपनको एमेच्योर खण्डमा सद्भावले आफ्ना साथी गल्फ खेलाडी सुभाष तामाङलाई पछि पार्दै च्याम्पियन बनेका थिए ।

त्यसको लगत्तै अर्को कार्यक्रममा उनले सूर्य नेपाल गल्फ टुरको पहिलो उपाधि जिते। उनी टूरको उपाधिसँगै एमेच्योर खण्डमा पनि प्रथम भए । मार्चमै सद्भाव र सुभाषले बंगलादेशमा भएको ३६ औं ओरियन बंगलादेश एमेच्योर च्याम्पियनसिपमा पुरुष टिम इभेन्ट पनि जितेका थिए।

जुन २०२२ मा, सद्भाव र सुभाष भारतको पहिलो व्यावसायिक गल्फ, खेलकुद विज्ञान र शैक्षिक संस्था तरुण सरदेसाई गल्फ एकेडेमी (टिएसजी) मा भर्ना हुन बैंगलोर गएका थिए । टीएसजी एकेडेमीमा भर्ना भएदेखि आफुले धेरै प्रगति गरेको सद्बावको भनाइ छ ।

सद्भावले बैंगलोरको टिएसजी एकेडेमीमा सामेल हुने आफ्नो इच्छा पूरा गरेकोमा आफ्ना आमाबाबुप्रति कृतज्ञता व्यक्त गरे, “त्यहाँ सहभागी हुन ठूलो बजेट चाहिन्छ,”आफ्नो पहिलो गल्फ टुरको उपाधि जितेपछि उनले भने, “आज म मेरा आमाबुवाको त्यागका कारण यहाँ छु ।”

उनले आफ्नो सुधारको श्रेय एकेडेमी र मुख्य प्रशिक्षक तरुण सरदेसाईलाई पनि दिए । ‘एकेडेमी आएपछि धेरै सुधार भएको छ । वहाँ नभएको भए मेरो खेल यो स्तरमा पुग्ने थिएन,’ सद्भावले थपे ।

सद्भावका अनुसार टीएसजी एकेडेमीका मनोवैज्ञानिक परामर्शदाताले उनको खेलको विकासमा महत्वपूर्ण भूमिका खेलेका छन् । “मेरो मनोवैज्ञानिक परामर्शदाता प्रणव जोसको पनि मेरो खेललाई आकार दिन महत्वपूर्ण भूमिका छ । उनले मलाई खेलको दौरान दबाब कसरी व्यवस्थापन गर्ने र खेल्दा मलाई धेरै मद्दत गर्ने अन्य धेरै कुराहरू सिकाउनुभएको छ, “सद्भावले भने।

सद्भाव आफ्नो अर्को चुनौती, ७४ औं सिंगापुर जुनियर गल्फ च्याम्पियनसिप २०२३ को लागि पर्खिरहेका छन् । यो प्रतियोगिता जुन महिनामा सिंगापुरको सेलेटर कन्ट्री क्लबमा हुनेछ। “म सिंगापुर जुनियरको लागि साँच्चै कडा मेहनत गर्नेछु र मेरो परीक्षा पनि आउँदैछ, त्यसैले मैले मेरो अभ्यास र अध्ययनलाई सन्तुलनमा राख्नुपर्छ,” सद्भावले भने ।

आफ्नो लक्ष्य बारे सोध्दा सद्भावले आफ्नो प्रारम्भिक लक्ष्य एसियाली खेलकुद र ओलम्पिकमा स्वर्ण पदक जित्ने रहेको बताए । उनको अन्तिम लक्ष्य, आफ्नो आदर्श खेलाडी टाइगर वुड्स भन्दा धेरै उपाधि जित्दै उनको रेकर्ड तोड्नु हो ।