काठमाडौं (हाम्रो खेलकुद)– सूर्य नेपाल टुर २०२२-२३ अन्तर्गतको अन्तिम प्रतियोगिताको रुपमा रहेको सूर्य नेपाल प्रिमियर गल्फ च्याम्पियनसिप मंगलबारबाट सुरु हुँदा शीर्ष वरीयताका लागि प्रतिस्पर्धा हुने भएको छ ।

गोकर्ण गल्फ क्लबमा हुने प्रिमियर गल्फ च्याम्पियनसिप चार दिन सम्म चल्ने छ । ७२ होलमा हुने च्याम्पियनसिपको सुरुवाती दुई दिनपछि शीर्ष २१ व्यावसायिक खेलाडीले मात्र अन्तिम ३६ होलको प्रतिस्पर्धा गर्न पाउनेछन् । जसमा एमेच्योरतर्फका शीर्ष ६ खेलाडी पनि रहनेछन् ।

कुल १५ लाख २० हजार पुरस्कार राशी रहेको प्रतियोगिताको विजेताले २ लाख ७० हजार र दोस्रो हुने खेलाडीले १ लाख ७० हजार रुपैयाँ प्राप्त गर्ने आयोजक नेपाल प्रोफेसनल्स गल्फर एसोसिएसन (एनपिजिए) का महासचिव दीपक आचार्यले सोमबार आयोजित पत्रकार सम्मेलनमा जानकारी दिए । त्यस्तै च्याम्पियनसिपको तेस्रो हुने खेलाडीले १ लाख २० हजार, चौथो हुनेले १ लाख र पाँचौं हुने खेलाडीले ८६ हजार रुपैयाँ प्राप्त गर्नेछन् । शीर्ष २१ भित्र पर्ने खेलाडी सबैले पुरस्कार रकम प्राप्त गर्नेछन् ।

च्याम्पियनसिपमा ४१ व्यवासायिक तथा एमेच्योरमा उच्च प्रदर्शन गरिरहेका सुभाष तामाङ र सद्भाव आचार्यसहित ९ जनाले प्रतिस्पर्धा गर्नेछन् । सुभाष र सद्भावले टुरको पछिल्लो दुई उपाधि जितेका छन् ।

टुर अन्तर्गत ८ मध्ये ७ वटा च्याम्पिनसिपको समाप्ती सम्म ५ लाख १३ हजार ५ सय रुपैयाँका साथ भुवन नगरकोटी यो सिजन सर्वाधिक कमाउने खेलाडी सुचीको शीर्षस्थानमा छन् । उनी भन्दा १९ हजार ५ सय रुपैयाँ कम ४ लाख ९४ हजार रुपैयाँका साथ दोस्रो नम्बरमा शुक्रबहादुर राई रहेका छन् । यस प्रतियोगिताले अर्को सिजनको नम्बर १ को पनि छिनोफानो हुनेछ ।

च्याम्पियनसिपको समाप्तीपछि शनिबार प्रोएम प्रतियोगिता हुनेछ । जसमा २५ व्यवसायिक र एक सय एमेच्योर गल्फहरुको सहभागिता रहनेछ बताइएको छ । एनपिजिएका अध्यक्ष रविन्द्रमान श्रेष्ठले च्याम्पियनसिपको मुख्य प्रायोजक सूर्य नेपाल र सहभागी खेलाडीहरुलाई धन्यवाद दिए ।