काठमाडौं (हाम्रो खेलकुद) – मात्र १३ वर्षको उमेरमा स्कुले विद्यार्थी आइस्टिना टन्डनले गल्फमा गजबको सफलता हासिल गरेकी छिन् । सामान्यतया कलिलो उमेरका खेलाडी जुनियर श्रेणीमा प्रतिस्पर्धा गर्छन्, तर भर्खर टिनएजमा प्रवेश गरेकी आइस्टिनाले नेपाली गल्फका अनुभवी महिला गल्फरलाई पछि पार्दै उपाधि पनि जित्दै आएकी छिन् ।

गल्फ सुरु गरेको तीन वर्ष नबित्दै उनी नेपालका शीर्ष महिला एमेच्योर गल्फरसामु कडा चुनौती पेश गर्दैछिन् । उनी आफ्नो लगातारको मिहिनेत नै सफलताको कारण रहेको बताउँछिन् ।

आइस्टिनाले सन् २०२० को मार्चमा आफूले खेलेको पहिलो प्रतियोगितामै जुनियर तर्फ उपाधि जितेकी थिइन् । त्यसयता उनले जुनियर विधामा दर्जन बढी उपाधि जितिसकेकी छिन् । २०२२ को नेपाल टुरिजम एमेच्योर गल्फमा महिला विधाको विजेता बनेकी उनी गत महिना सम्पन्न एसियाली खेलकुद छनोटमा चौथो भएकी थिइन् । ३ खेलाडी एसियाली खेलकुदको क्याम्पमा छनोट हुँदा आइस्टिना राष्ट्रिय टोलीमा पर्न चुकिन् ।

आइस्टिना हाल गल्फ प्रशिक्षक दिपक आचार्यसँग प्रशिक्षण गरिरहेकी छिन् । यो उमेरमा आइस्टिनाको सफलताले राम्रो संकेत दिएको उनी बताउँछन् । आचार्यका अनुसार अन्तिम दिन थकानका कारण खेल बिग्रंद आइस्टिना एसियाली खेलकुदमा छनोट हुनबाट चुकेकी थिइन् । आइस्टिना आफैं पनि एसियाली छनोटमा चुक्नुलाई सकरात्मक सिकको रुपमा लिएको बताउँछिन् ।

शारीरिक व्यायामका लागि गल्फमा छोरीलाई आवद्ध गराएका पिता चन्द्र टन्डन उनको प्रदर्शन देखेर हर्षित छन् । आइस्टिनाको सफलताको श्रेय भने उनले प्रशिक्षक आचार्यलाई दिए ।

आइस्टिनाका क्याडी पनि दिन प्रतिदिन खेल सुधार हुँदै गएकोमा खुसी देखिन्छन् । आइस्टिनालाई नेपालको पहिलो महिला प्रो बन्नेमा निकै आशावादी छिन् । तर उनले यसका लागि आफ्नो खेलमा निकै सुधार ल्याउनुपर्ने र आफ्नोमिहिनेत जारी राख्ने बताइन् ।

आइस्टिनाका पिता चन्द्रले खेलसँगै पढाइलाई पनि उत्तिकै महत्त्व दिन जरुरी रहेको बताउँछन् । आइस्टिना पनि पढाइ र खेलको सन्तुलन मिलाउन आफूले घरमै बसेर पनि प्रशिक्षण गर्ने गरेको बताउँछिन् । उनले परिवारले खेलमा निरन्तरता दिन निकै साथ दिने गरेको बताइन् ।

कलिलो उमेरमै जितेको उपाधिले उनलाई मनोबल बढाउन सहयोग गरेको छ । क्षमताले भरिपूर्ण आइस्टिना भविष्य राम्रो हुनेमा विश्वस्त छिन् ।

पुरुषको एमेच्योरतर्फ सद्भाव आचार्य र सुभाष तामाङले लगातार उच्च प्रदर्शन गरिरहँदा महिलातर्फ आइस्टिनाको उदयले समग्र गल्फ खेलको भविष्य उज्ज्वल देखिन्छ । कलिलो उमेरमै पहिचान भएका यी प्रतिभाको स्तरोन्नतिका लागि सरोकारवाला पक्षले आवश्यक भूमिका खेल्ने हो भने नेपालले विश्वस्तरीय गल्फर उत्पादन गर्ने सम्भावना राखेको छ ।

आइस्टिना, उनका पिता र प्रशिक्षक गफ करिअरबारे यसो भन्छन् । भिडियो हेर्न यहाँ थिच्नुहोस ।