काठमाडौं (हाम्रो खेलकुद) – नेपाल एपिएफ क्लबले सातौं प्रधानमन्त्री कप एनभिए महिला तथा पुरुष राष्ट्रिय भलिबल क्लब च्याम्पियनसिपमा त्रिभुवन आर्मी क्लबमाथि कठिन जित हात पारेको छ । कडा प्रतिस्पर्धात्मक खेलमा एपिएफ पाँचौं सेटमा पुगेर विजयी भएको हो ।

सुरुवाती दुई सेट जितेपनि त्यसपछि लगातार दुई सेट हारेपछि खेल रोचक बनेको थियो । राष्ट्रिय खेलकुद परिषद्(राखेप) को कभर्ड हलमा भएको खेलमा एपिएफले आर्मीलाई ३०-२८, २५-२३, २०-२५, १९-२५ र १५-६ ले जित्न सफल भएको हो ।

पहिलो सेटमा एपिएफ लगातार पाँचौं पटक सेट प्वाइन्टमा पुगेर चुकेको थियो । छैटौं पटक उक्त सेट पाइन्ट हात पारेको थियो । त्यसअघि सुरुवातमा आर्मीले ४-९ को खेलमा उत्कृष्ट पूनरागमन गर्दै १३-१३ बराबरीमा पुर्याएको थियो । कडा प्रतिस्पर्धात्मक खेलमा अन्तिममा एपिएफले जित हात पारेको थियो ।

तेस्रो सेटमा एक समय आर्मी १-७ को अवस्थामा थियो । त्यो अवस्थाबाट आर्मीले सानदार पूनरागमन गरेको थियो । आर्मी ७-१५ को अवस्थाबाट पुन पूनरागमन गर्दै १८-१८ को बराबरीमा ल्याएको थियो । १९-१९ को अवस्थाबाट लगातार पाँच अंक बटुल्दै आर्मीले जितको आधार तय गर्यो ।

चौथो सेटमा पनि सुरुवातमा १-५ को अवस्थामा थियो । उक्त अवस्थाबाट सानदार पूनरागमन गरेको थियो । ६-६ को अवस्थामा गएर बराबरी गरेको थियो । आर्मीले चौथो सेटमा १३(१३ को बराबरी अवस्थाबाट अघि बढेको थियो ।

पाँचौं सेटमा भने आर्मीले सुरुवात देखीनै पछि पर्दै पराजित हुन पुग्यो । आर्मीको लागि सुनिता खड्काले सानदार प्रदर्शन गरेपनि जित दिलाउन सकिनन् । एपिएफको जितमा नायक बनेकी निरुता ठंगुन्ना प्लेअफ द म्याच चुनिन् ।