काठमाडौं (हाम्रो खेलकुद) – सातौं प्रधानमन्त्री कप राष्ट्रिय भलिब क्लब लिगको महिलातर्फ फाइनलमा आज नेपाल पुलिस क्लब र नेपाल एपिएफ क्लबबीच प्रतिस्पर्धा हुँदैछ । खेल दिउँसो १२ बजे राष्ट्रिय खेलकुद परिषद् (राखेप) को कभर्डहल त्रिपुरेश्वरमा सुरु हुनेछ ।

नेपाल पुलिस अपराजित रहँदै ५ खेलमा १५ अंकका साथ शीर्षस्थानमा रहँदै फाइनलमा पुगेको हो । एपिएफ ५ खेलमा ४ मा जित र १ मा हारसहित ११ अंकका साथ दोस्रो स्थानमा फाइनल खेलेको हो ।

नेपाल पुलिस क्लबले लिगमा एपिएफलाई ३–० को सोझो सेटमा पराजित गरेको थियो । पुलिसले प्रतियोगिता कुनैपनि सेट हारेको छैन । एपिएफ, न्यू डायमण्ड, एभरेष्ट र गण्डकी प्रदेशलाई सोझो सेटमा हराएको थियो । एपिएफले पुलिस बाहेक अन्य सबै टोलीलाई हराएको थियो ।

पुलिसमा युवा स्पाइकर उषा भण्डारी, कामना विष्ट, पुनम चन्द, क्विक स्पाइकर कोपिना राना लगायतका खेलाडी छन् । उषा र कामनाको प्रदर्शन महत्वपूर्ण हुनेछ ।

उता एपीएफमा स्पाइकर सरस्वती चौधरी र निरुता ठंगुन्नाको प्रदर्शन निकै महत्वपूर्ण हुनेछ । चोटका कारण सरस्वती पूर्ण रुपमा खुलेर खेल्न सकेकी छैनिन् । उनी अनुभवी खेलाडी हुँदा सरस्वतीको प्रदर्शन निकै महत्वपूर्ण हुनेछ । त्यस्तै राष्ट्रिय टोलीका दुई सदस्य कविता भट्ट र पुष्पा चौधरीबाट एपिएफ फाइनल खेलमा उच्च प्रदर्शन चाहन्छ ।

एपिएफले सुरुवाती तीन खेलमा अनुभवी खेलाडी बिनिता र रेश्मालाई अन्तिम समयतिर मौका दिएको थियो । तर न्यू डायमण्डविरुद्ध सुरुवात देखीनै पहिलो रोजाईमा खेलाएका थिए । यी दुई अनुभवी खेलाडी आफ्नो अनुभवको फाइदा भरपूर्ण उठाउन सक्छन् ।

पुरुषतर्फको फाइनल दिउँसो ३ बजे हुनेछ । पुरुषतर्फ फाइनलमा टिपटप हेल्प नेपाल र नेपाल पुलिस क्लबबीच प्रतिस्पर्धा हुनेछ । दुवैतर्फको विजेता टोलीले ६ लाख, दोस्रो हुनेले ३ लाख, तेस्रो हुनेले १ लाख ५० हजार र चौथो हुने टोलीले ७५ हजार रुपैयाँ प्राप्त गर्नेछन् ।

प्रतियोगितामा पुरुष तथा महिला तर्फ सर्वोत्कृष्ट खेलाडीले समान ३५ तथा उत्कृष्ट सर्भर, सेटर, ब्लकर, स्पाईकर, लिवेरो र प्रशिक्षकले जनही १५ हजार रुपैयाँ प्राप्त गर्ने छन् ।