काठमाडौं (हाम्रो खेलकुद) – नेपाल पुलिस क्लबले सातौं प्रधानमन्त्री कप राष्ट्रिय भलिब क्लब लिगको महिलातर्फ फाइनलमा नेपाल एपिएफ क्लबलाई हराउँदै उपाधि जितेको छ ।

फाइनलमा पुलिसले एपिएफलाई ३-१ को सेटमा हराउँदै ६ लाख पुरस्कार पक्का गरेको हो । राष्ट्रिय खेलकुद परिषद् (राखेप) को कभर्डहल त्रिपुरेश्वरमा भएको फाइनलमा २५-१२, २१-२५, २५-२३, २५-१९ को सेटमा हराउँदै उपाधि जितको हो ।

पहिलो सेट सहजै गुमाएको एपिएफले दोस्रो सेटमा उत्कृष्ट सुरुवात गरेको थियो । दोस्रो सेटमा एपीएफ १६-९ को बलियो अवस्थामा थियो । उक्त अवस्थाबाट पुलिसले लगातार तीन अंक जोड्दै पुनरागमनको सम्भावना देखाएको थियो ।

तेस्रो सेटमा एपीएफ ६-६ को बराबरीमा थियो । तर उक्त समयबाट लगातार तीन अंक जोडेपछि पुलिस दबाबमा पर्दै टाइम आउट लिएको थियो । टाइम आउटपछि लगातार तीन अंक ९-९ क बराबरी गरेको थियो ।

एपिएफले लगातार चार अंक जोडेपछि एपीएफ १४-१० को अवस्थामा थियो। लगातार चार अंक जोड्दै १६-१६ को बराबरी गरेको थियो । तेस्रो सेटमा एपीएफ २१-१८ ले अघि हुँदै जितको सम्भावना देखाएको थियो ।

तेस्रो सेट २३-२३ को बराबरी भएपछि खेल रोचक बनेको थियो । पुनम चन्दले उक्त बराबार गरेकी थिइन् । २१-२३ को खेल पल्टाउदै लगातार चार अंक जोडेपछि पुलिसले खेलमा २-१ को अग्रता लिएको थियो । चौथो सेटमा पुलिसले १७-१७ को बराबरीबाट अघि बढ्दै जितको आधार तय गरेको थियो ।

विजेता टोलीले ६ लाख, दोस्रो हुने एपिएफले ३ लाख, तेस्रो हुने न्यू डायमण्डले १ लाख ५० हजार र चौथो हुने आर्मीले ७५ हजार रुपैयाँ प्राप्त गर्नेछन् ।