पर्वत (हाम्रो खेलकुद)– चितवनका प्रविण लिङथेप र राजु थापाले जोडीलले पर्वतमा आयोजित खुला ब्याडमिन्टन प्रतियोगिताको उपाधि जितेका छन् ।

जिल्ला खेलकुद विकास समिति पर्वत र पर्वत मोदीकाली ब्याडमिन्टन संघ कुश्माको समन्वय एवम् कुश्मास्थित स्पोर्ट्स हाउसमा भएको फाइनलमा प्रविण र राजुको जोडीले लाफा समूहका विवेक न्यौपाने र मनोज फौदारको जोडीलाई १५–२१, २१–१७ र २१–१८ ले हराउँदै उपाधि जितेको हो ।

पोखराका विशाल बस्नेत र एपिएफका प्रनिश ठकुरी तथा धादिङका राम ठकुरी र पर्वतका प्रेमकुमार गुरुङको जोडी संयुक्त रुपमा तेस्रो भएको थियो । विजेता जोडीले उपाधिसहित ४० हजार रुपैयाँ प्राप्त गर्यो । त्यस्तै जोडीले हार्नेश जीपलाईन कुश्माको तर्फबाट निशुल्क जीपलाईनको अवसर प्राप्त गरे । दोस्रो हुने जोडीले २० हजार र तेस्रो हुने जोडीले समान १० हजार रुपैयाँ प्राप्त गरे ।

त्यस्तै साविक धौलागिरी स्तरीय सि लेभल पुरूष युगल ब्याडमिन्टन प्रतियोगिताको उपाधि बागलुङ गल्कोटका राजन कार्की र सागर भण्डारीको जोडीले जितेको थियो । राजन र सागरको जोडीले बागलुङ बरेङको सबिन थापा मगर र देभन मगरको जोडीलाई २–१ ले पराजित गर्दै उपाधि जितेका हुन् । डिमुवा पर्वतका लक्ष्मण श्रेष्ठ र कृष्ण हमाल( तथा म्याग्दीका बेल र अभिषेक नेपालीको जोडी संयुक्त रुपमा तेस्रो भएको थियो ।

विजेता खेलाडलाई पर्वतको मोदी गाउँपालिका पर्वतका उपाध्यक्ष बिमल लामिछानेलगायतले पुरस्कृत गरे । नेपालको वरियतामा शीर्ष २० भित्र नरहेका खेलाडीसम्मलित १९ जोडीले खुलातर्फ प्रतिस्पर्धा गरेका थिए । त्यस्तै सि लेभलको प्रतिस्पर्धामा भने ७२ जोडीको सहभागिता रहेको प्रतियोगिताका संयोजक सुनिल थापाले जानकारी दिए ।