काठमाडौं (हाम्रो खेलकुद) – नेपालले एसिया कपमा भारतविरुद्ध पावर प्लेमा विष्फोटक सुरुवात गरेको छ । पालेकेले इन्टरनेशल क्रिकेट स्टेडियममा टस हारेर पहिला ब्याटिङको निम्तो पाएको नेपालले १० ओभरमा १ विकेट गुमाउँदै ६५ रन बनाएको छ । आसिफ शेख ३४ बलमा ४ चौकासहित २३ र भीम सार्की क्रिजमा छन् ।

ओपनर कुशल भुर्तेल २५ बलमा ३ चौका र २ छक्कासहित ३८ रन बनाउँदै आउट भएका छन् । कुशल शार्दुल ठाकुरको दशौं ओभरको पाँचौं बलमा विकेटकिपर ईशान किशनबाट क्याच आउट हुन पुगे । पहिलो विकेटका लागि आसिफ शेख र कुशल भुर्तेलले ९.५ ओभरमा ६५ रनको साझेदारी गरेका थिए ।

हार्दिक पान्ड्याको नवौं ओभरको पहिलो बलमा कुशललाई ब्यक्तिगत २२ रनमा अम्पायरले एलबीडब्लू आउट दिएका थिए । तर कुशल भुर्तेल रिभ्युलिँदै बचेका थिए । बल लेग स्टम्प बाहिर गएपछि कुशल आउट हुनबाट बचेका थिए । कुशलले दुई ठूला जीवनदान पाएका थिए ।

तीव्र गतिका बलर मोहम्मद शामीको पहिलो ओभरको अन्तिम बलमा बल एज लागेर फस्ट स्लिपमा जादा श्रेयस ऐरले कुशल भुर्तेललाई ब्यक्तिगत एक रनमा जीवनदान दिएका थिए । शामीको पाँचौं ओभरको दोस्रो बलमा लेग साइडमा खेलेको बल विकेटकिपर ईशान किशनले पुन छाड्न पुगेका थिए । कुशलले दोस्रो जीवनदान ब्यक्तिगत ७ रनमा पाएका थिए ।

अर्का ओपनर आसिफले पनि एक जीवनदान पाएका थिए । दोस्रो ओभरको पहिलो बलमा आसिफलाई एक रनै विराट कोहलीले जीवनदान दिएका थिए । कभरमा प्रहार गरेको सर्ट विराट कोहलीले सर्ट कभरमा जीवनदान दिन पुगेका थिए ।