सुबास हुमागाईं, हाङ्गचौ

हाङ्गचौस्थित ओलम्पिक रंगशालामा झन्डै १ घण्टा चलेको अधिकारिक कार्यक्रम र २५ मिनेट लामो विविध प्रदर्शनीले चीन विश्व खेलकुद मात्र नभएर प्रविधि र प्रस्तुतिमा कुन स्तरमा छ भन्ने पुष्टि गरेको छ ।

वातावरणमा हुने असरलाई ध्यानमा राख्दै यसपटक उद्घाटन समारोहमा कुनै किसिमको आतिशबाजी भएन । प्रविधि र खेलकुदको मर्मलाई एकसाथ प्रस्तुत गर्ने प्रयासमा आयोजक समिति सफल भयो । उद्घाटन समरोहमा देखाइएको प्रस्तुतिमा पटक पटक एसियाली राष्ट्रहरु एक भएर जानुपर्ने संदेश दिइएको थियो ।

चीनका राष्ट्रपति सी जिन पिङले विधिवत उद्घाटन गर्नुअघि मार्च पास, खेलाडी र रेफ्रीको सपथ, ओलम्पिक फ्लेम प्रज्वलत लगाएत प्रक्रिया पनि विशेष रुपमा प्रस्तुत गरिएको थियो । मार्च पासमा नेपालको झन्डा उसुकी निमा घर्ती मगर र तेक्वान्दोका वीर बहादुर महराले बोकेका थिए । नेपालका प्रधानमन्त्री पुष्पकमल दाहाल प्रचण्ड पनि समारोहमा सहभागी भएका थिए ।

उद्घाटन समारोह अघि नै पुरुष भलिबल र टेबल टेनिसको टिम इभेन्टमा नेपालको चुनौती सकिएको छ । दुवै खेलमा समूह चरणका दुवै खेल हार्दै नेपाल बाहिरिएको थियो । आइतबार नेपालले उसु, जुडो, तेक्वान्दो, रग्बी सेभेन्स, बक्सिङ, पौडी, ई-स्पोर्ट्स र टेनिसमा प्रतिस्पर्धा गर्नेछ ।

नेपालका २९ खेलका २ सय ५३ खेलाडीले यसपटक एसियाली खेलकुदमा चुनौती पेश गर्नेछन् । नेपाल सन् १९८६ यता एसियाली खेलकुदमा कम्तिमा १ पदक जितेको इतिहास छ । एसियाडमा यसपटक ४५ देशका १२ हजार ५ सय बढी खेलाडी प्रतिस्पर्धा गर्दैछन् ।