सुबास हुमागाईं, हाङ्गचौ

१९ अ‍ौं एसियाली खेलकुद अन्तर्गत नेपालको पिस एलिट एसिया गेम्स (पब्जी) को सेमिफाइनलमा प्रवेश गरेको छ ।

क्वाटरफाइनलको समूह सी मा नेपाल शीर्ष दुई स्थानमा रहँदै सेमिफाइनल चरणमा स्थान बनाउन सफल भएको हो । नेपाल रहेको समूहबाट हङकङ समूह विजेता बन्दै अघि बढेको हो । 

नेपालले पहिलो चरणमा दोस्रो स्थान हासिल गरेपछि त्यसलाई निरन्तर कायम राख्यो । वरीयताका आधारमा सिधै क्वाटरफाइनलमा स्थान बनाएको प्यालेस्टाइनबाट त्यसपछि चुनौति अपेक्षा गरेपनि नेपालले लगातार समय अन्तर बढाएको थियो ।

यस समूहबाट तेस्रो र चौथो भएका प्यालेस्टाइन र साउदी अरब भने बाहिरिएका छन् । अब नेपालले शनिबार हुने सेमिफाइनलमा अन्य चार टोलीसँग समूहमा प्रतिस्पर्धा गर्नेछ ।

सेमिफाइनलमा दुवै समूह खेल भोली हुनेछ । यद्यपि समूह विभाजन भने भइसकेको छैन । सेमिफाइनलमा शीर्ष दुई हासिल गरे नेपाल फाइनल पुग्दै पदकको सम्भावना हुनेछ ।

नेपालले एकपछि अर्काे खेलमा पराजय भोग्दै गर्दा पदकको आशा गरिएको पब्जीले भने लगातार दोस्रो पटक अर्को चरणको यात्रा तय गरेको छ । नेपालबाट कप्तान सुविन महर्जन, दीपेश गुरुङ, सागर भण्डारी, समीर गुरुङ र संगिन भट्टराई खेलाडी रहेका छन् । भिक्टर पौडेल टोलीमा व्यवस्थापक रहेका छन् ।

व्यवस्थापक पौडेलले कमजोर तयारीका बाबजुद टोलीले निकै राम्रो नतिजा ल्याइरहेको बताए । ‘हाम्रो तयारी कमजोर भएपनि यहाँ आएपछि टोलीले नियमित प्रशिक्षण र खेलका कारण राम्रो सुधार गरेको छ । अब आउने चरणमा उत्कृष्ट प्रतिद्वन्द्वी छन् । हामी सेमिफाइनल पार गर्न सक्दो प्रयास गर्नेछौं,’ उनले भने ।

कप्तान सुविन महर्जनले वरीयता प्राप्त प्यालेस्टाइनलाई पछि पार्दै अघि बढ्न सक्दा खुसी व्यक्त गरे । ‘आज खेल सहज थिएन ‌। तर पहिलो चरणबाट अग्रता बनाइरहन सक्यौं । अब अर्को चरणमा निकै कठिन प्रतिद्वन्द्वी छन्,’ उनले भने ।

महर्जनले पदकको आशा राखेकाले सेमिफाइनल पार गर्न केही दवाव भने रहेको स्वीकारे ।