(हाङ्गचौं (हाम्रो खेलकुद) – नेपालले १९ औं एसियाली खेलकुद (एसियाड) मा माल्दिभ्सविरुद्ध मध्यम ब्याटिङ प्रदर्शन गरेको छ । टस जितेर पहिला ब्याटिङ रोजेको नेपालले ११ ओभरमा ४ विकेट गुमाउँदै ७६ रन बनाएको छ । रोहित पौडेल ४ र गुलशन ८ रनमा क्रिजमा छन् ।

नेपालले पहिलो विकेटको रुपमा ओपनर आसिफ शेखलाई ८ बलमा १ चौकासहित ६ रनमा गुमाएको थियो । आसिफ तीव्र गतिका बलर नासिर नाइल इस्मालको बलमा कभरमा सट खेल्ने धुनमा फरिद शिउसबाट क्याच आउट भएका थिए । पहिलो विकेटका लागि आसिफ र कुशल भुर्तेलले २.३ ओभरमा २० रनको साझेदारी गरेका थिए ।

कुशलले छैटौं ओभरको चौथो बलमा ब्यक्तिगत ३१ रनमा जीवनदान पाएका थिए । विनोद भण्डारीसँग तालमेल नमिल्दा रन आउट हुनबाट बचेका थिए । कुशल भुर्तेल १८ बलमा ५ चौका र १ छक्कासहित ३५ रनमा आउट भए । कुशल तीव्र गतिका बलर मिउभान मोहमदको बलमा एलबीडब्लू आउट भए ।

एक वर्षपछि नेपाली टोलीमा खेल्ने मौका पाएका विकेटकिपर विनोद भण्डारीले १५ बलमा १ चौकासहित १३ रनमा आउट भए । सन्दीप जोरा ९ बल खेल्दै ५ रनमा क्याच आउट भएका छन् । उनी तीव्र गतिका बलर बदिउ इस्माइल नवाजको बलमा ठूलो सट खेल्ने धुनमा मिउभान मोहम्मदबाट क्याच आउट भएका थिए ।