काठमाडौं (हाम्रो खेलकुद) – युएईका प्रमुख दुई ब्याटर मोहम्मद वासिम र आसिफ खान त्रिकोणात्मक टि२० आई सिरिजमा नेपालसँगको खेलमा आउट भएका छन् । माथिल्लो मुलपानी क्रिकेट मैदानमा टस हारेर पहिला ब्याटिङको निम्तो पाएको युएईले ९ ओभरमा ४ विकेट गुमाउँदै ५४ रन बनाएको छ ।

युएईका बासिल हमिद २ र अली नासिर ६ रनमा क्रिजमा छन् । नेपाललाई तीव्र गतिका बलर सोमपाल कामीले पहिलो ओभरको अन्तिम बलमा पहिलो सफलता दिलाएका थिए ।

युएईका लागि डेब्यू खेल खेलेका ओपनर खलिद शाह ठूलो सटको धुनमा मिडअफमा कप्तान रोहित पौडेलबाट क्याच आउट हुन पुगेका थिए । उनले ६ बल खेल्दा खाता खोल्न सकेनन् ।

करण केसीको चौथो ओभरको पहिलो बलमा एलिशान शराफु एज लागेर ६ रनमा विकेटकिपर आसिफ शेखबाट क्याच आउट भए । तेस्रो विकेटका लागि आसिफ खान र मोहम्मद वासिमले २४ रनको साझेदारी गरेका थिए ।

गुलशन झाको सातौं ओभरको पहिलो बलमा लङअनमा सर्ट खेल्न चाहेका वासिम मिडविकेटमा कुशल भुर्तेलबाट १७ रनमा क्याच आउट भए । वासिमले १८ बलमा १ चौका र १ छक्का प्रहार गरे ।

गुलशनको नवौं ओभरको चौथो बलमा आसिफ खान प्वाइन्टमा सन्दीप जोराबाट क्याच आउट भए । उनले १२ बलमा २ चौकासहित १५ रन आउट भए । युएईका दुई प्रमुख ब्याटर आसिफ र वासिम गुलशनको शिकार बनेपछि संकटमा परेको छ ।