काठमाडौं (हाम्रो खेलकुद) – साविक विजेता नेपाल एपिएफ क्लबको महिला टोलीले चौथो टाइगर कपको फाइनलमा प्रवेश गरेको छ ।

त्रिभुवन आर्मी क्लबको महिला टोलीलाई २ सेटले पछि परेको अवस्थाबाट पुनरागमन गर्दै एपिएफले फाइनलमा स्थान बनाएको हो । आर्मीले सुरुवाती दुई सेट सहजै जिते एपिएफले त्यसपछि लगातार तीन सेट जित्दै उपाधि भिडन्तमा स्थान पक्का गर्यो ।

आर्मीले सुरुवाती सेट २५-१९ र दोस्रो सेट २५-२० ले जित्यो । त्यसपछि एपिएफले २५-१२ र २५-१६ को अन्तरले जित दर्ता गर्दै पुनरागमनको बाटो बुन्यो । पाँचौ सेटमा आर्मी अन्त्यसम्म अग्रतामा रहेपनि एपिएफले त्यसमा पनि पुनरागमन गर्दै १५-१३ को जितसहित फाइनलमा स्थान बनायो ।

यसपछि दोस्रो सेमिफाइनलमा समूह बी को शीर्षस्थानमा रहेर अघि बढेको चन्द्रागिरी नगरपालिका न्यु डायमन्डले नेपाल पुलिस क्लबको सामना गर्नेछ । विदेशी खेलाडी सम्मिलित गण्डकी प्रदेश र भारतको हरियाणा टोली समूह चरणबाट नै बाहिरिसकेका छन् ।

दिनको अन्तिम खेल समय अभावका कारण प्रतियोगिताको पहिलो दिन स्थगित भएको गण्डकी प्रदेश र त्रिभुवन आर्मी क्लबबीच हुनेछ । पहिलो दिन गण्डकी २-१ को अग्रतामा रहेपनि आज खेल सुरुवातदेखि खेलाइनेछ । उक्त खेलको विजेताले सेमिफाइनलमा स्थान पक्का गर्ने भएकाले पनि कडा प्रतिस्पर्धा हुने आँकलन गरिएको छ । यद्यपि खेलको नतिजा र अंक अनुसार समूह विजेता र उपविजेता छिनोफानो हुनेछ ।

पुरुषतर्फ समूह बी बाट एपिएफ समूह विजेता र श्रीलंका आर्मी उपविजेता बनिसकेका छन् । यस्तै समूह ए कै हेल्प नेपाल स्पोर्ट्स क्लब पनि सेमिफाइनलमा पुग्ने पक्का भइसकेको छ ।

प्रतियोगिता अन्तर्गत शुक्रबार महिलातर्फ तेस्रो खेल र पुरुषतर्फका सेमिफाइनल खेलहरु हुने तालिका रहेको छ । यस्तै प्रतियोगिताको अन्तिम दिन पुरुष र महिलाको फाइनलसँगै पुरुषको तेस्रो स्थानको खेल पनि हुनेछ ।

महिला र पुरुष दुवै तर्फको विजेता टोलीले समान ५ लाख ५५ हजार ५ सय ५५, दोस्रो हुनेले २ लाख ५५ हजार ५ सय ५५ तथा तेस्रो हुनेले १ लाख २५ हजार ५ सय ५५ रुपैयाँ प्राप्त गर्नेछन् ।