काठमाडौं (हाम्रो खेलकुद) – नेपाली राष्ट्रिय महिला भलिबल टोलीकी कप्तान अरुणा शाहीसहित भारतीय राष्ट्रिय टोलीका ३ खेलाडी आठौं आरबीबी-एनभिए महिला तथा पुरुष भलिबल च्याम्पियनसिपमा एभरेष्ट भलिबल क्लबबाट खेल्ने भएका छन् ।

एभरेष्टले शनिबारदेखि सुरु हुने प्रतियोगिताका लागि कप्तान अरुणासहित भारतीय राष्ट्रिय टोलीबाट पहिलो रोजाइमा खेल्ने स्टार मिडल ब्लकर सुर्या थोटंगल, केपी अनुश्री र जिन्सी जोनसनलाई अनुबन्ध गरेको छ । तीनै खेलाडी नेपाल आइपुगिसकेका छन् । टोलीको प्रशिक्षण भने अर्जुन घिमिरे नै रहेका छन् ।

एभरेष्टमा यी ४ बाहेक घरेलु भलिबलमा प्रभाव जमाएका खेलाडी पनि छन् । निशा चौधरी, मिना सुनार, अनुषा चौधरी र आरति चौधरी पनि टिममा छन् । यसबाहेक टोलीमा ऋतु पुन, प्रमिला जिसी र रिचा थापा छन् ।

सूर्या नेपालमा गत वर्ष सम्पन्न एभिसी सेन्ट्रल जोन महिला च्यालेन्ज कपको सर्वोत्कृष्ट खेलाडी चुनिएकी थिइन् । उक्त प्रतियोगिताको उपाधि भारतले नै जितेको थियो । यी तीनै खेलाडीले एसियाली खेलकुदमा पनि सहभागी थिए ।

एभरेष्ट प्रतियोगिताको समूह ए मा रहेको छ । यस समूहमा गत संस्करणको विजेता नेपाल पुलिस क्लब, विभागीय टोली त्रिभुवन आर्मी क्लब र कर्णाली प्रदेश पनि छन् । एभरेष्टले प्रतियोगिताको पहिलो खेलमा शनिबार विहान ८:३० बजे कर्णाली प्रदेशको सामना गर्दैछ ।

अर्को समूहमा चन्द्रागिरी नगरपालिका न्यु डायमन्ड, नेपाल एपिएफ क्लब र मधेश प्रदेश छन् । दुवै समूहका शीर्ष २ टोली सेमिफाइनलमा प्रवेश गर्नेछन् ।